發展商真係吹得就吹！但極技窮！

我留意很多舊生很易輕信各類媒體的邏輯，其實，也不只我的舊生，該是大多數人；然而，媒體一向失真，是潛規則，它只是「大戶」的喉舌，幫其造勢。

我所指的大戶，不只持貨強的投資者或機構投資者，而是在社會具影響力的人或集團，就像這幾天的香港樓市，各大發展商準備推較優質既樓盤，於是開始藉各傳統和網上媒體來吹噓價值了。新鴻基在啓德有優質盤要推，雷霆就先「成就」一個特色戶既高價交易，為樓盤定下一個超高水平的價值；於是，減大半到30000元一呎也很「便宜」囉，更何況雷霆打算均價22000一呎（我估計）推盤，這推盤手法，雷霆在沙士時期已常用，像青衣的珀麗灣和美孚的曼克頓山等等，都係先來個特色戶狠爆一個高價先。

長實郭子威更厲害，憑空叫價，特色戶交易也不做了，黃竹坑Blue Coast高層4房海景單位，佢由呎價4萬元，短短一星期，開天殺價話可去到5萬元一呎，叫價真係無口，佢開心就得！無非都係透過媒體造勢創造價值，咁最後劈落嚟就好似好抵咁！

唔單只發展商，美聯儲仲狼，明明心裏面打算今年唔會減息，但仲要出口術講預計今年要減息三次，咁有需要，點解而家唔減一次呢？係咁咦0.125吖！根本純出口術調整市場預期，實無心減息。

呢一兩日，日本負利率取消後，日元不升反跌，好多媒體（包括日媒）的解釋係：預計日本利息升幅極緩慢（一定㗎啦，唔通急升咩！）預期美日息差仍闊。咁而家美聯儲話今年減息3次，咁預期美日息差應該收窄啦，又唔見日元匯價應消息倒升？似是而非的邏輯，你吸收了，以此來部署投資，輸死你！

都係老話，獨立思維好重要。