香港街頭攝影一代宗師—— 何藩

作為香港人，有位攝影師你應該要知，佢就係畫面既記錄者（佢影呢張相個時只係得十令歲），被譽為「東方布列松」既何藩，亦係開創香港街頭攝影先河既「一代宗師」。

何藩以拍攝上世紀50、60年代既香港而聞名，所遺留落黎既作品，絕大部分都係佢29歲前所影，雖然佢晚年因健康問題，無法好似後生個陣嗱住部相機邊走邊拍，但對攝影既執著並冇因為咁而減少，一得閒就去圖書館睇同攝影有關既書，學習大師經驗、瞭解時下既攝影趨勢，而且，佢仲用左10年時間去學Photoshop，將屋企既舊底片「翻新」，讓自己可以繼續有得玩，繼續享受係攝影方面既創作，有時甚至忘我到會通宵執相，完全冇退休既心態。可以講，何藩一生都鑽研攝影之道，而佢亦只有係攝影裡頭，先可以盡情表達自己，了無掛礙。

跟住落黎，本文將透過介紹佢生前所出版既經典三部曲，分別為《香港追憶》、《人生舞臺》同《香港‧往日情懷》，同你地一齊走進佢鏡頭入面個個已逝去既時代，回顧一下佢係攝影方面既轉變，以及所下過既苦功。

《香港追憶》：

早期，何藩以「畫意攝影」作為創作既開端，呈現出極具詩意既結構意象。佢同布列松一樣，係攝影方面都有屬於自已既偏執，為左影到心目中完美既畫面，佢可以連續幾日踎係同一個地點，摸清當地形成最佳光影既時間，當畫面既構圖、佈局、人物位置等，所有野都出現係最佳位置既瞬間，就㩒快門，一氣呵成，將佢所感受到既貌象聲色，傳遞比觀賞者。

此外，何藩更將古代詩詞所表達既意境，融入至街頭攝影。佢同布列松既作品，或多或少都帶有D超現實主義既色彩，但二人唔同既地方在於：布列松受繪畫既影響較深，而何藩就受到古代文學意境既啟發較深，就以《日暮途遠》為例，當時佢深受北周文人庾信《哀江南賦》入面既意境所影響，於是想用鏡頭代筆，用相片去呈現出箇中類似既情感畫面：

“日暮途遠，人間何世？”

“日窮於紀，歲將複始。”

於是就有左下面呢張《日暮途遠》：

對何藩本人黎講，時隔五十多年，呢張仍然係佢本人畢生最愛既一張相。

於何藩而言，技術固然重要，佢有助內容既表達，但藝術既內核，始終源於創作者既藝術修養。就好似古今中外既一D偉大作品，佢地之所以有靈氣，深刻動人，就係因為作品注入左深刻既含蘊，思想上有獨到既見解或領悟，咁先可以可以引發觀者既思考，令觀賞者產生共情：可以係一種對靈魂既呼喚、一種深心既對語，一Ｄ令人心神嚮往，感動不已既畫面，又或者係一種對人生、世界既啟示等等。雖然呢d相叫做佢比較早期既作品，但無論從形式定抑或內容上，都已達至一定既高度同厚度，除左能夠體現出構圖美學意識之外，更掌握畫意攝影既神髓，用「東方布列松」去讚譽佢係攝影方面既造詣，實不為過。