香港樓市愈嚟愈似內地樓市

星期六屯門Novo Land 開賣188伙，據傳媒報導，折實呎價為12830至14775元。

但呢個折實價究竟有無扣到較「暗」既優惠呢？譬如送全屋傢俬再加另外7至8項其他名目嘅折扣，聽聞仲每間既優惠都有分別，問你死未！真係嗰交易一日唔落到田土廳度，我地都無解法清楚嗰光豬價。不過，就當上面個折實價計埋呢d優惠啦，中間價約在$13800。

另一方面，物業二手交易廖廖可數，剛過去一星期，其中一個係將軍澳新都城1期6座中高層B室，實用面積呎364平方呎，兩房間隔，以600萬元沽出，實用呎價16484元。

另一個係沙田第一城，兩房單位，44座低層F室，實用面積約284方呎，望東南，以約445萬元成交，呎價約15,669元。

果如我兩個月前喺YouTube 所言，而家一手價遠低於二手價，有一成多；當然，你會話唔同區份bor，但今時今日地鐵都覆蓋好多地方，而Novo Land 鄰近2鐵，都唔係一個偏僻地，而且係新樓bor。

常理，喺咁既一二手價格結構下，一手平咁多，你都會走去買新樓，咁亦解釋到二手交投點解咁靜，而有交易既的二手物業，亦大可能因為單位的特殊性或買家既特殊偏好，譬如坐向東南，又或買家對該地段有迷信或情意結，如果唔係，點解要比多一成以上既價錢。

亦都因為咁，中原指數喺反映樓市狀況已經失卻準確度。其實好多人都覺得奇怪，點解樓市落緊，但中原指數都無乜點跌。原因佢只反映二手物業價，但二手業主好多已供完，而且係老人家，揸價好硬，有交易都一定係高價先得，所以成交量都唔多，於是二手交易既sample size 根本細得出奇，毫無代表性。

而家係一手物業主導市場，中原地產應該出多個一手光豬價指數。

其實呢種長時間地一手物業平過二手物業既現象，內地早已存在。

香港，愈來愈似一個內地城市。