我對當下香港教育市場的睇法

探討一下香港的教育市場。

坦白講，如果仲有年青一代投放心力喺香港現下學制下公開試既補習班，我會覺得佢地有無諗清楚呢種產業既前景；亦因為我呢種諗法，我見過去十年嗰位唯一較紅的補習老師，離開所屬公司自立門戶出嚟搞呢類補習，我真係覺得佢有d搵自己老襯，大樹好庇䕃嘛！喺大店賺埋餘下光輝既日子，咪仲實際！起碼唔駛自己狽皮費，淨袋收入，條數易計好多。

當然，我老啦，心態唔同左；年青人總有抱負，想自己出嚟闖一闖，我既諗法欠缺生涯規劃，太保守。

但話雖如此，我喺舊學制，始終曾赤手空拳無依賴大店提𢹂下，建立自己不錯的補習事業，我對香港既教育市場睇法，多少應該有d話語權。

如果你有留意網上既廣告（巴士廣告真係好out!)你會留意近幾年有好多具獨特風格既教育機構出現，譬如教英文，有專事教IELTs 既，連校舍都係合規既IELTs 試場，夠曬專業；教小朋友電腦編程既，有佢地獨特既coding bootcamp 課程，做playgroups 既，更加有佢地林林種種既教學形式，香港的教學市場在後疫症時期，如雨後春筍般展現出唔同既格局，再唔係以前嗰套以考試技巧為招徠手法的老套經營調子。

我認為呢種演變，多少與內地教育體制既改變有關，內地既「雙減」政策，已令補習行業走向沒落，代之而起是一連串的興趣班興旺起來；影響所及，香港有志於教育產業既，也會循這方向發展，一來香港跟隨這教育國策，是遲早的事，若現在還投放資源喺DSE，隨時到老一場空，倒不如呢一刻在香港打定專門興趣班基調，藉以方便將來走入大灣區展開拳腳；二來香港的學習風氣已不像從前，十多年前，學生以爭入頭三大為榮；今天，他們認為有學位已足夠，無論家長與學生，都不再以「專」為榮，倒認為「多元」的見識與學養，更為見用。

近兩年，我努力學習科技，也是基於以上既想法，我一生與教育事業結緣，要甩都甩唔到；但我不信一個教學內容可以教足五十年，一定無咁荒謬；於是，我放眼當今世界求學既潮流，然後朝這方向增值。

真既，若我再開實體教學，一定不會再有DSE 班，咁無前景既野，仲做！？我會開以科技為主調的各類班種，由兒童到成人，打做ECONEXP 2.0!