Tesla仍有獨特性但而家重貴

舊生問我， 點睇Tesla？

疫症期間，除左比特幣價格以驚人倍數上升外，就係Tesla （TSLA)呢隻美股，由2020年初到2021年尾，股價升左十倍，但從嗰時開始，佢既股價就不斷回落，最低見約100美金，現在160美元左右。

個人認為，Tesla 當下既股價仍有下跌空間。

主要原因當然係環球經濟仍處於滯脹，導致Tesla的生產成本上升，而聯儲局的持續加息政策，又不斷削弱耐用品如電動車的需求，以致Elon Musk 在年頭曾發動減價戰刺激銷售量，雖能提升左出車量，但營利就減少左。

呢個亦係當前汽車產業普遍上所面對的困境，尤幸Elon Mask 係一個生意佬，面對呢種逆勢，曉炒人！但最終炒得唔夠狠（舊年年中話要炒一成人，但最後半成都無），所以我認為呢間公司短期股價好難大升（除非狠炒人）。

另一方面，Elon Musk 年頭要發動減價戰，一方面要刺激銷路，另一方面係要維持市佔率，咁亦話比我地知，Tesla正面對市場份下跌的危機，佢雖然擁有全球電動汽車行業14%既市場份額，但電動車的市場競爭正不斷升溫，除左上海汽車、比亞廸、福特、起亞和Volvo外（呢幾間公司亦各佔全球市場份額7至9%)，Lucid Group和Rivian Automotive等純電動汽車公司亦正在迅速進入市場，通用汽車又繼續加大對電動汽車領域既投資，可見未來對手都幾多。而且，若論呢d對手的增長率，特別係上海汽車同畢菲特減持中（但股價卻不斷攀升）的比亞迪，還要高過Tesla 的增長率，由此可見，呢間龍頭公司所面對的競爭壓力，認真唔細。

不過，話雖如此，Tesla 仍有佢既獨特性和優勢，佢既自動駕駛系統（佢d車既software 介面的而且確係勁過同業既）和減低耗能方面(特別在國內，相對於其他同業，Tesla既超級充電基礎設施網絡和其配套既充電樁發展，最為完善），都帶嚟顯著既經濟效益，唔可以睇小，喺未來日子，都真係會為呢間公司增值。

現下股價160美元左右，我覺得仍有下跌既空間，只因未來兩年，經濟環境只會更差！都幾影響佢既北美市場（佢既市佔率有成65%架），而中國市場雖大，但內地既競爭對手又亦步亦趨，情況並唔係太樂觀。

佢股價跌到120美元，我就會考慮入手。