Novoland 嗰125%按揭plan 真係聽到都心寒

呢個plan 十足似你去澳門賭錢，你無錢，疊馬仔借錢比你賭大細咁，你仲好似賭白頭片咁，5年後就見光死。

你借凸嗰25%，都唔夠比嗰5年的供款，供息就夠，啫係話，5年後，你都係欠樓債超過100%。嘩！你5後點清同搵銀行做按揭呀，仲要做按保添！如果你揀呢個plan 入市，我真係會同你講：「你同自己有仇呀！對自己咁差！」

若果呢5年內樓價續跌，你仲甘，直情係失控！未來5年，真係睇唔到樓市有長升既動力，偶然嚟個小陽春係可以既，但好快又會持續跌落去，樓價真可以無多2至3成架，唔係講笑！

假設五百萬一個單位，你同新鴻基呢個plan 攞到六百二十五萬；五年後，若樓價跌兩成，你個單位得400萬，當你做到按保，要比40！你到時都要比返二百六十五萬出嚟！如果你五年後咁有把握比到呢個數，點解唔等五年後先買？五年，容乜易過！無錯，呢5年你要租屋住，但呢個plan 5年比既息都同你交租差唔多，記住！第四第五年係7釐息！

咁如果你問：「咁樓價升我咪有著數咯！」你歡喜啦！你諗得開心咪開心咯，唔阻你！

理性既買家一定唔會揀呢個plan，要拎呢個plan，不如唔好入市，等5年後入！而我覺得新鴻基都唔會好願offer 呢個plan ，純粹gimmicks ，因為同佢攞得呢個plan既客，都應該好有問題，未來供唔供到落去同還唔還到錢架！

而家發展商賣樓，真係好辛苦，因為佢地自己心知肚明，係賣緊計時炸彈。