JPEX既操作該是如此———由下而上均是替死鬼

舊生問：「Alex，你點睇JPEX 事件？」

其實，都無乜野睇；整個故事，由下至上都係由人性貪婪構成，結果就係下中上三線均付出沉重代價，而最頂層，根本不用逃之夭夭，只是帶著恥笑，看著它的「艇仔」一個個被拉進監牢。

這場遊戲，誰最明白人性的貪婪，誰就最能駕馭這劣根性，就是大贏家。

世上真有些投資者，像飛蛾般，見火就撲，完全不問情由，思想極簡單。個遊戲係咁玩：開頭你半信半疑某交易平台，所以先嚟輕注，平台當然會給你甜頭；你再試深一d，無事bor，又再信多d；一而再再而三，試過三次都無鑊氣，你開始鬆懈，甚至因嗰個平台比你更大既甜頭，你誓死相隨了；儍瓜，人地騙你係騙你最終極嗰一大注，開頭唔比d「誠信」你，你點會落踏，釣大魚都要比多d魚餌同耐性啦，人地用時間去磨走你既懷疑，然後先嚟終極一騙！

好了，有左一批「曉」相信既客唔夠，仲要d旁人推波助瀾，於是甘詞厚幣打賞網紅推廣，真係唔野少，郁下就幾十萬，d網紅唔落踏有鬼！甚至拎埋自己個人名聲同實際身份嚟「保」薦，當中我相信林作最蠢，亦想咬得最大，佢當保險咁做，要分成，JPEX 當然開心同極願意成其美事，因為有人自薦做超級替死鬼！

呢班網紅唔知道，佢地不斷咁收錢，就陸續正名自己做替死鬼。

JPEX 既上層一直好神秘，無人知係乜野組識揸莊。有d舊生好奇，咁大個平台，咁多交易同往來，只會順藤摸瓜追索下去，遲早會牽出呢班人嘛！

錯！牽極都係替死鬼，網紅上面就係嗰d「代理人」，代理人會比警方trace 得到出嚟同捉埋，因為佢地分紅分得比網紅仲多，同下線接頭最多，一定捉到，而且要受更大既靶！

如此類推，一層一層咁上去，一層一層既替死鬼，該公司在各地註冊既人都係替死鬼，到最終極嗰層，戶口過數純係加密貨幣戶口（呢方面既䁥名，真係方便左呢d超級大罪犯），喺無人知曉戶口係邊個既情況下，實在難以搜證，更何況佢地未必係當地人，最後警方知邊個都無用，喺現有法制下都捉唔到人同告唔入。

由第一日客戶存入穩定幣，就註定最頂嗰層可施施然挾款而去。

一個貪字，貫穿成個運作。