Google 廣告收益不易賺

有位極相熟舊生跟我分享，想打造一個網上討論區，要跟連登爭下市場份額，我一向無上高登連登，唔太清楚呢d討論區發展到乜野模樣，但我聽佢講要投放數十萬，我真擔心佢回不到本，我問：「咁點回本？」

「諗住靠Google 廣告收益。」

我有d愕然。

關於Google 廣告收益，絕對係我經驗之談，我可以分享。但一言以蔽之，絕不輕易！

首先，Google 既演算法，有時會莫明奇妙ban 你d野，就以YouTube 𤔡例，我雖然未試過，但我已聽到唔少人話拍出嚟d既野被「黃標」，即被禁落廣告，原因係莫明奇妙，又非色情亦非暴力，但d YouTubers 用左好多心機同錢，Google 一野ban 過嚟，甚麼也沒有了，真令人極為氣餒，而網站既廣告都係咁，Apps 廣告亦都係，要ban 你不用原因；而Google 亦不會公開其演算法，佢要ban 就ban ，唔駛解釋。呢種不確定，令好多YouTubers 好苦惱，我苦惱嘛！唔苦惱，因為我知有呢種風險，所以你見我YouTube拍野只係齋講，如果咁都ban，咁我個樣都應該幾色情或者暴力。當然，我咁無風險，回報亦唔高。

第二，我呢位舊生係想開討論區，而唔係做內容既網站，問題嚟啦，Google 唔係由你話事話落廣告就會落，係要比佢審批既，我前後做左十個網站，佢只批左我四個，其他網站唔批既原因，我到而家都唔知（好多個我改完又改Google 都唔批），咁舊生係做討論區，唔係資訊媒體，我相信仲難批。

第三，唔係佢批左個網站就有收益，嗰網站要有好多traffic ，要多人上，你要不斷做好多內容，嚟要睇嗰d人按嗰d廣告睇先有收入，唔好諗住用AI generates d垃圾文，Google 知架，同埋垃圾文章根本無人睇，你點會有traffic ！更唔好講d廣告會比人按到（唔好諗住自己按，Google 又係知道既）！有一件事，你必須明白，Google 既演算法係好犀利！

有無留意我好多文章都用廣東話寫，就係怕Google 以為我用AI 寫，又突然ban 鬼左我！所以我先棄用書寫語。

基本上，我早上5點幾起身，就開始做YouTube 、Websites 同Apps 既內容，將我五十多年泥既識見押下，毫無保留，由朝做到晚，每晚瞓時我都係昏迷咁瞓著。

第三，亦都係最重要因素，Google 既廣告收入唔多，如果你唔識自己起websites 同Apps ，瓣瓣要比錢靠人，咁你基本上無乜剩！

咁你會問，咁Alex 你又做，我半退休咁做，點同呢！加上我喜歡創作（你地學生時代我已經拍網劇啦），做自己喜歡做既事，就唔怕辛苦！

仲有！如果可以，我往後想喺呢個基礎上開展網上科技教育，呢個先係我主菜！我想打造一個華語既Udemy。

你試下你website d創作又比錢請人做，YouTube 就搵靚女拍，咁你蝕硬。

換言之，Google 比我既廣告收益，其實係我由朝到晚創作既收益，我一停創作，就無。

所以，呢d唔算係一盤生意；當然，有d個別例子好成功我唔會抹殺，但唔輕易兼要有大運氣。

同埋，要做好呢件事，根本同你投放幾多錢無關，係講你可唔可以放成副心力落去，同好講恆心。

有錢，都係嗰句，買比特幣啦！