AMD 別具謀略 ——— 收購Silo AI

做生意，講利潤重成本效益，企業生產當然以「夠用」就得，唔會盲目追求高質的投入，唔通發展商起樓，材料不問價，全用高質咩！？你買過長實李嘉誠既樓就知，乜野都係啱啱好！佢老人家夠知洗衣機歐洲牌子好啦，唔通賣個普通單位比你都用上呢d牌子咩？豐澤牌算啦！

同樣原理，無錯NVIDIA 的GPU 晶片係強大好多，但貴嘛！而且佢仲想焗你用埋佢既侍服器軟硬體添，嚟個綑綁銷；問題係，喺實際人工智能應用方面，真係唔駛下下都用到咁強大既功能嘛！譬如電器產品既維修客服，應該來來去去都係嗰d電話對答，咁所需的機器學習同語言模型都唔駛咁複雜，搵個平D既AI 平台開發咪得咯！下下搵NVIDIA，未必圍到條數架！

我相信AMD 收購Silo AI，就係要針對呢d唔同既大小市場。無錯！可能嗰d超大語言模型唔會搵AMD 既晶片，好似chatGPT 同 Claude ，佢地既生成式AI 要回應使用者唔同背景既題型，硬件的機器學習和運行效率真係要好高，唔到唔用NVIDIA 既晶片；但商業世界好多功能都係集中喺某個對應範圍，好似共公企業和銀行的客服，咁隨時用AMD 晶片再加上Silo AI 度身訂造的軟件，已經夠用。

咁而家AMD 收購左Silo AI，喺為客戶度身訂造軟硬體，整合性大大提高，更能配合各大商戶所需，同最重要，價錢可更相宜。

如果今天NVIDIA 比喻作十多年前剛出iPhone 的蘋果，那AMD 就是當日的Samsung ；前者主要針對高端市場，而後者就滿足各類的小眾市場，且以較相宜既價格佔得顯著的市場份額。

昨晚得知AMD 收購Silo AI，我就更加肯定這企業是採用長尾理論這種避重就輕的政策，來跟NVIDIA 一爭天下，我認為蘇媽大智大慧，絕對跟其遠親有得鬥！

亦因如此，我看好AMD 股價；不過，這份看好，跟我舊年看好NVIDIA ，在股價上升路徑上，絕不可類同。

這重心，我另文探討。