未來十年，究竟有乜野好炒？！

我地已步入二次世界大戰後既第二個七十年，咪默守成規，好多上七十年致富既方法而家都唔Work ，炒樓就係其中之一。

全球人口萎縮，而樓就狂起，樓層又愈來愈高，香港更離譜，單位愈間愈細，細到過去十年起埋d納米樓怪胎。基本上，全世界的apartments 都供應過剩，炒唔起！好似澳洲，中國人同印度人投資apartments 全部坐曬艇，而家大部份去澳洲做物業投資既人，係買地起house，而唔係買apartments 。

貧富懸殊愈嚟愈嚴重下，有錢人就更有錢，佢地買物業當然要買house ，而且好肯比錢。所以，我估計未來十年，炒得起既物業應該唔會係apartments ，太多啦！物以罕爲貴，該只得house 有得炒。

如果你仲想靠炒apartments 致富，相信會好失望，apartments 以後真係只愛嚟住，無乜好炒！

咁你會話，咁我又唔係有錢人，炒唔到house ，咁可以炒乜？唔通炒的士牌？！

炒科技囉！嚟緊呢幾年，所有有得炒既野，都係同科技有關：人工智能、無人駕駛車、空中私家車、日系科技股、區塊鏈Layer 2 等等，無一樣野同科技無關既，應該可以炒足十年！

炒科技同炒物業的最大分別係：前者你必須要有一定的科技學養，先有一定的觸覺，快人一步搵到可炒上的項目，啫係你無得懶，閒時真要吸收多d科技生態的文化，唔係一定要你識編程，但你連Github、Discord 同 X有d乜野科技訊息可八卦都唔知，咁將來點投資呢？

物業投資大開大合，買完等運到等佢爆升，炒賣既人都特別財大氣粗；投資科技就較細緻，都幾充實自己，對自己既學養亦有提升，真係氣質都好d！

無得逃避架啦，未來十年想做好投資，大家好好學習科技！唔好淨係旨意我建議，我咁老，好快釘！