物業市場有炒家，但無炒勢！

自從政府撤辣後，物業市場就有種聲音，講到樓巿好興旺，點狂熱，兼有炒家出動，就連我一向欣賞既施永青，最近也極語無倫次，做節目講到撤辣後交投比預期高好多，由認為只升三成結果意外地係升左三倍，咁驚人！原來只係跟二月比，唓！二月過農曆新年加超淡市，物業交投有幾多呀？！零星落索，升三倍都唔見得有幾大交投量啫！

任何常態的市場，都有炒家，沒甚麽特別，他們的存在亦未必炒得起個價；港府撤辣，市場復常，有炒家出現非常合理，若因有他們的出現，就大驚小怪，認為樓價定必被炒高，這是誤判。

炒家可以炒燶的，他們也是人，不是神，會錯斷市場趨勢；而今回，有入市的炒家，大有可能是這樣的下場，惹來一身尾大不掉的樓債。

當下出現一少撮炒家，就講到炒風再起咁，如果真有炒勢，炒家們本身就係極剛性既需求，佢地會推動樓價上升，但日日報導的二手交投，全部大蝕讓，有炒家爭貨就唔係咁啦，唔通d炒家有「價格聯謀」，協議一齊質低d價咩！證明市場根本炒家不多，一個半個就講到天咁大！

如果有人真係信有得炒走去接貨，就算佢執到比高位平三成的貨，其實都係當下的市價，根本就係搵自己笨，買個物業嚟折磨自己。

本來我不太睇淡香港經濟，但一個一個的長假，條街愈嚟愈靜，d街鋪空置量愈嚟愈多，大家樂晚市都可以有2/3座位吉既，我都覺我過往既樂觀，太一廂情願，不得不轉念。

如果你話樓市而家好旺，啫係D人恨住香港啦，咁d人去左邊，一個多人炒賣物業既城市，會係咁靜既咩！？你回憶下，過往香港樓市炒到熱烘烘時，成個城市氣氛係咁！？假期bor！發展商仲唔推盤，港人唔留港等搶樓買，節目嚟架嘛！而家嗰城市feel ，係咁咩？你唔好呃我，我雖然老到又聾又盲。

唔好話炒勢無，常態既買勢都唔見得長久，我相信物業市場這輪既購買力已消耗得七七八八，長實嗰新盤都未必可以熱賣。

呢期我都罷睇施永青，覺得佢有D發矛，講野亂籠！