真擔心香港遲早失去低稅天堂的美譽

細個嗰陣，讀書讀到香港呢個城市點解咁有吸引力，其中之一就係：稅制簡單，而且稅率甚低。

真擔心呢個美譽，好快都消失埋。

如果你有留意，港府財政儲備已經跌到得7,000億元左右，唔好以為呢個數目好大，只係足夠未來一年既公共開支，如果政府未來收入再無大改善，遲早要喺稅制度開刀。

廿年前沙士，港府財政儲備都係得7,000億元左右 ，但當時情況跟而家真係南轅北轍。

當時物價已回落到極低水平，私營部門減薪顯著，公務員人工亦要減，減價減人工從來都係治療經濟既良藥；反之現在，物價仍高企，公私營部門薪酬仍高，呢個就係滯脹的恐怖，經濟已萎縮，但物價水平（包括名義工資水平）完全失去調節功能，經濟無自我復原能力，活動不暢旺，何來有顯著稅收收入呢！

2003年政府賣地平有平賣，流標或收回招標土地甚少，庫房仍有可觀實質進帳；反觀而家，政府有地要成功賣出似好艱難咁，賣地收入一向是政府的主要收入來源，呢方面無乜大進脹真係好濕滯。

當時，最重要將香港經濟起死回生既，唔駛講梗係內地人剛因加入世貿而富起來，而開放自由行真係令香港經濟翻幾翻，各行各業賺到錢，自然有稅交。而家，內地人已「暴富」完，回歸踏實！我地再難依靠內地既購買力再一次嚟托起香港經濟，可賺錢既生意，愈嚟愈少，利得稅稅收都少好多。

內部物價水平調節機能失靈，外部强大購買力又不再，點算呢！？

今早，我見到馬路有幾個司機鬧對面個交通警：「咁樣抄牌發告票架咩！離撚譜！」

唉….. 以後經濟方面，因政府缺錢，違例就係違例，要嚴正執法，無人情講了。