當遇上交通督導員與用刀狂徒時

差唔多每日都有用刀傷人既案，呢個城市，愈嚟愈刀光劍影，活像一個武林。而家你同人噪交，要預防對方唔知邊樹有把刀，突然劈過嚟。

人生無常固然係，但而家喺香港，更無常，好危險。你行出街，隨時一不留神，譬如亂過馬路，會被便衣檢控；同時間，你又要防身邊既路人甲或乙，可能身上有刀…..

於是，我地隨時陷入呢種情況：過馬路既時候，見到隔離條友自言自語，又疑似佢身上有d隆起的物件，可能係刀！想行快d，但係綠燈bor，而你又望到對面，有個好漫不經意想過馬路既人，但一d都唔似想過馬路，大有可能係便衣交通督導員，唔過得，但衝綠燈要罰錢，咁點算？！

你知道，如果隔離條友真係用刀劈過嚟，對面呢位交通督導員係唔會體諒或救你，佢兩眼只係望住你對腳，有無踏出馬路。

所以，可能會出現呢幕：我同刀手相互瞟了一眼，條友就真亮刀劈過嚟，我向前走避，衝綠燈了，個癲佬係咁追住劈，我係咁避，喺條馬路度我不斷用詠春既空手入白刃抗敵；而同時間對面位交通督導員氣定神閒，低頭拿起紙筆，準備抄低我身份證，而最重要係只得我無癲，佢只係準備抄我牌，無打算抄嗰癲佬牌！

我不斷躲避癲佬的追劈，嚟到對面馬路，呢位交通督導員帶笑同我講：

「先生，請你拿出身份證，下次唔好未到紅燈就過馬路，好危險㗎！」

我雖然好忙，但生怕督導員話我唔合作，要進一步為難我，唯有左手努力摷出身份證嚟比佢，右手就依然拼命跟條癲佬對格！

鏡頭開始wide shot ，慢慢影照這個城市。

充滿武學。