乜野叫做有得做既生意？

一門生意點先叫有可為呢？不如等我分享下點解昔日我會揀做高考補習老師！

首先，大家都知，我唔係無得揀先做補習老師，我係正正式式喺香港大學畢業，完成學士同碩士學位，我嗰個年代，仲未普及教育，學位唔易有，有左，就大把出路，最差都可以喺中學教書，唔愁無野撈。

所以，唔係補習呢門生意當時有得做，我真唔會投入！

咁點解當日高考補習有得做？

第一：高考好深，深到基本上中學老師唔識教（或者無料教），呢d係當時所有高考生的共識，要考好，唔到佢地唔出嚟補我地，市場係有實實在在既需求；而我自問自己，真材實料，有實學，可應市！

第二：嗰時讀書風氣強，莘莘學子個個恨入大學，仲要恨入頭三大，係「學生求老師」，而唔係好似而家咁「老師求學生」，我都話過，求人好難，你要求學生就無得做啦！我嗰時情況係：課室已爆人，仲有新生話寧願企都想報讀，咁你話好唔好做！

第三，1992 年開始，港府將教育政策改變，由精英制改為普及制，學生會考極低成績都可以上預科，加上當時學生人口眾多，突然之間，成個預科補習市場人數以倍上升，大到嚇死人，咁先有得大做嘛！

第四，係我自身問題，亦都係最重要，我認為我除左自己學問有料之外，我對我自己既presentation 好有信心，認為絕對可以獨當一面，深信自己既獨特風格可以「壟斷」市場；呢方面，我無誇口，係絕對成功既，我廿年既高考學生可做證！

做生意一定要有壟斷成份，否則，個個可以同你爭，你有鬼得做！就算做到都唔長，好快就會比人搶左生意，咁盤生意賺錢都無用（除非短期勁賺好多），都唔得長久。

呢幾個因素加埋，先可以造就補習產業既豐厚收入，咁生意先有得做！

如果盤生意只係夠糊口，除非你無得揀，否則，出去大公司打份工好過啦！