我點解認為NVIDIA股價只會持續攀升 

舊生見NVIDIA 已升了很多，不敢下注，想待其價回一回才入手，常理想法！

但我恐怕輝哥個價不但不會回，反而會持續攀升上去，好似過去十年既蘋果咁，嗰時2013年，我喺趣味投資班（放心！呢d班種我呢世都唔會再開，絕無sell 野動機）已經不斷講，Tim Cook 呢條生意佬、大小通吃，只要有市場就會做，唔似Steve Jobs 咁咁有藝術執著，「呀添」必定令蘋果賺大錢，要入手；結果呢隻野，十年嚟係咁升，有時怕升得太勁，驚散戶買唔起，兩次拆細，一次2014年一拆七，另一次2020年一拆四。

我睇NVIDIA 都有呢個趨勢，佢有乜趨勢呢！？就係AI愈做愈細，但我相信呢個「細」，係未來十年，科技突破生活既另一切點。

「細」在那裏呢？你而家玩嗰d人工智能既模型，係佢規範比你既，佢比你玩乜你就玩乜，所以我成日話呢d野貪得意玩下就幾有趣，但不切實際，因為呢d模式過於general ，同你或你公司所需未必有關係，未必幫到手！

所以人工智能的模式要有用，就必須「客制化」，要係customised 既AI ，要依你公司既獨特需要設計模型，邊d野可以比AI學習，而較敏感資料就唔比得佢，怕佢大口仔，流左出去，嗰AI模型要設計得好細。

情況就好似過左十年編程所用既API ，你係喺你backend 自己做API 出嚟比前端用，你公司唔會只用public API ；客製化AI 模型同樣原理，佢要同你公司backend 配合，做出你公司所需要既人工智能自動系統。

而NVIDIA呢間公司跟住要做既，就係呢方面為客人既軟件設計，為各大小公司客製化AI 模型，嘩！呢盤生意，同Tim Cook 做法相同，都係大小通吃，NVIDIA 未來十年和味咯！每個網站同手機Apps ，footer 標誌著「powered by NVIDIA AI!」。

所以，NIVIDA 唔只做GPU硬件比各大雲端提供AI 服務同埋運行資料中心，佢自己喺以色列都整左個超大data centre ，準備自己一展拳腳。

一間企業，早期開發，我地唔知佢幾時成熟，同都唔知會唔會真係成熟，唔敢落注，合理！好啦，佢經歷完「潛龍勿用」階段，開始「飛龍在天」，剛被肯定實力，你居然就話佢飛得太高，要跌落嚟？！

NVIDIA 先剛起飛，有排都未「亢龍有悔」啦！

反而Apple 就到左啦！