別被國際熱錢哄騙—日經指數的假突破

近一個月，國際熱錢的焦點均在日本的股票市場，於是，全球傳媒又大書特書，彷彿上世紀七八十年代的盛世日本要回來了….

我認為這只是國際資金哄騙出來的趨勢，大家不要急著將強積金急轉去日本基金。

的而且確，日本既企業近十年開始「開竅」，知道自己產品受歡迎，就唔應該鎖國式般將產品困喺日本本土，要走出去，面外世界，UNIQLO成為超級大模範，於是日本有很多品牌都在海外開設分店，無實體店都同海外網店合作。

直至今天，日本仍是傳統百貨的實業之王，產品質素有保證，世人也愛買，所以這一對外出擊，非同小可，令好多日本企業的生意翻兩翻，加上日元貶值，在海外賺外匯，返到自己國家就好好使！所以踏入2020年後，日經指數已上了三萬水平，過去一個月的升幅，話就話破三十年日經指數紀錄，其實無乜特別，升幅其實好微，與其話佢呢幾年爆升，不如話佢過去三十年太潦倒合理d。四十年！計埋環球印過咁多銀紙，1989年年尾既日經指數40000，起碼係而家100000啦！升到30000真唔可以話日本回來了！始終佢科技產業，要急趕追上！

不過，亦真因為日本企業經營模式既改變，的而且確一洗過往經濟頹風，我舊年YouTube 都講過，佢既大城市樓價會持續攀升。

但係最近既突破，我認為係短暫現象，只係日元匯價極低殘，而家係5.5算！我係國際資金都有得計，日元升起值上嚟會好急，話都無咁易就7算以上，座底起碼有2成賺，再加而家吹噓「日本經濟回來了」，儍儍的日本人可能拎d儲蓄出泥買股票，咁計埋個市升，國際熱錢既回報都有三四分以上，相當唔錯！

環球物價水平上升，對日本向外伸展既企業係有著數既，賣價都好d，但滯脹亦令生意唔好，日本企業要真有為，日經指數要大爆升，都係要等環球滯脹完左先得，即係要多幾年。

至於話日本本土終於有一兩點子通脹，大佬，全球脹到咁，你日本都脹都脹下，就真恐怖！仲有，日元貶值都加速國內本土野提價，一來物料來價（有d係入口架嘛）貴左，要加價；二來海外遊客又因日元貶值而願意比高d價錢，碗東京日本拉麵都貴左啦！

下半年，日元一升值，日經指數就會回落返三萬樓下。

我係咁睇！