成個香港，而家只得保險稍為好d生意。

如果你問我點揀股票，我真無興趣睇𠴱d財務數據，呢d相關的知識，我年青時喺大學學過曬，廿多歲時有鋪考試癮，乜野試都走去考餐懵，無諗過要讀博士，但走去考GRE同佢既科目試，無想過讀工商管理，都去考GMAT，一定唔會做會計師，照考ACCA，欠level 3 未考齊，我就連地產專業試都考埋，只欠CPA 無去考，因嗰時高考Econ 補習開始紅，無暇身痕走去考試。

所以從學理上，嗰d財務分析我算識啦，但真唔覺得呢d野可幫我揀股票。

倒不如信自己的眼，同跟相關產業的人傾談，重容易了解實際情況，數據係過去的，買股票係買未來，兩者並沒有絕對既關係，雖然我知從會計帳目中可睇到經營者係咪成本控制得妥當。

你而家走去d大型商場望望，譬如海港城、K11同新鴻基d大場睇睇，平日靜到呢～～～，又多圍板圍住d鋪位有待租出，你就知商場租金收入爲佢地帶泥既利潤不高啦，加上商業單位空置率高，賣私樓又要劈價，點睇香港既地產股都唔慌好，真係唔駛睇財務報告表都知啦！

我好多舊生都係做銀行既，佢地職位唔會低，都同我呻生意好差，好難做，咁銀行股點入得手呢！除非有舊生同我講佢地間銀行想同加密貨幣做好朋友啦，唔係我真係對銀行股無興趣。

唯一我收翻泥既資料，疫後通關d保險生意就真多左，始終多左內地人嚟買保險，d保險公司都喺機場爭位開檔插旗，即係d大保險公司股票我地就可以望多兩眼囉，留意下！但我無叫買呀！我唔會推介任何股票，自己投資自己分析，就算保險產業有可為，你都要睇睇某隻保險股係咪已經price in 左呢d利好因素，已經over-priced。

咁可能就真要望下佢地d財務數據，參考一下，但要分析得細緻，就咪攪我。