以後買香港住宅物業只能談「保值」，再難言「升值」。

香港市道在變格，通通都在變，譬如一些傳統連鎖店子，像超市百佳、實惠、通利、戲院等等，佢地既規模都需要腰斬一半，才能因應當下香港格局，生存下去，呢d品牌唔會全執，但分店量真係唔使咁多，而家邊有咁多人買野吖！

如果我所言成真，所有連鎖店都cut 一半規模，釋放出嚟的商用樓面真唔野少；所以，未來商鋪租值，仲有好大既下跌空間，我見到，你見到，銀行更加見到，所以佢地對商用物業的call loans 絕不手軟，大佬！而家你揸香港商用物業，仲虛無過揸加密貨幣，真係深跌完有排都唔升，銀行撥備都撥到儍，唔call loans 有鬼！

至於住宅物業點變格呢？我相信，未來十年，買樓係講「保值」，而唔係「升值」；日後香港，物業可以大幅升值真唔好諗啦！不過，唔同區份的住宅物業，會有唔同既保值能力，我相信會係趨勢。譬如東九啓德，潛在供應仲要「排山倒海」咁，規劃上又夾雜左d過渡性房屋同居屋，不倫不類，遊輪碼頭又好以無乜發展勢頭咁，經呢處嚟既遊客根本唔多，海景又唔係維港煙花景，如此荒涼的區段，物業好難貴重得起！

相反，西九物業就唔同，我認為有一定的保值能力，因為該地段無乜新供應，而且發展左廿幾年，又高鐵又接駁機場快線，每日人流頻密，已經自成一角，成為一個非常貴重既地段。大家要明白，無論香港點變格，每一個時代總有人會撈起左，發左！咁佢地有錢又想喺香港長住，要買樓，買邊度呢？物以罕為貴，要買都唔同發展商接d地段唔湯唔水的貨尾啦！完全展現唔到佢地撈起左既身價嘛！

香港樓市，各區各自發展，將會愈嚟愈鮮明，某一區或某個樓盤會保值d，而某D則重要持續減值。