二手物業市場再難靜下去

昨天屯門上嵐餘貨33伙，減價約四成多後再售，結果真一Q清晒！

另一方面，新地以地價約4000元投得嗰幅沙田住宅用地，地價較同區兩年前的一幅住宅用地低五成。

今日啓德柏蔚森第二次賣，約一百個單位鬆d，相信該買晒，正路發展商第二次推盤量應該同第一次好接近，可能新世界都見幾個盤第二輪賣得一半，所以自動投降，呢轉推約一半多單位量算，均價同上次差不多，都係跟同區高位實平三成。

上述行情話我地知，樓價已實跌三成，我意思即係你已經好難喺市場搵到劈少過三成價既盤。

真係好彩香港有好多有錢人，個底夠厚，蝕得起！

但蝕得起有兩個含義：

第一種蝕得起係業主仲可以由物業放喺度，唔賣。

第二種蝕得起係業主要而家賣啦，樓價再跌就蝕唔起！因為再蝕就唔係無左過去十年物業的升幅，而係真燒到老本。

以上第二種業主真會諗放物業，寧大屋搬細屋。所以樓價再跌一成，將由佢地觸發，真係與其等發展商再劈一成，不如先發制人，無咁傷嘛！若等到發展商個個盤減四成，二手業主就要減五成架啦！

我估計，嚟梗兩季既二手交易量會上升，因為好多業主怕咁樣落去，容乜易第日樓價無六成架！點解？若果而家嚟緊二手劈一成，跟住發展商又再劈一成，若業主到時先賣，咪由劈五成起錶計囉！咁好快劈到六成。

物業市場，恐怕會出現人踩人局面。