商場劏舖短期獲利令我百思不得其解

大家都知，香港的商用物業市場，要比住宅物業市場跌得更慘更烈，你睇d炒舖大王同佢d子孫點蝕賣就知，一蝕就億億聲，好恐怖。

特別嗰d三線商場劏舖，唔好話而家淡市，旺市時都係死場，根本唔值錢，只係旺市水浸，個價仲可以托住，一到淡市，就見「死場之值」，一d都唔值錢！

所以，我唔明呢d短期獲利個案：

尖沙咀「劏場」首都廣場獲炒家以10萬元承接後，旋即以42.8萬元轉手，持貨不足1個月，賬面獲利32.8萬元，賺幅近3.3倍。

北角城市花園基座商場城市金庫一個面積僅82平方呎的劏舖，炒家以10萬元成交，新近以28萬元成功出貨，又係不足一個月，賺幅近1.8倍。

關鍵在於獲利係一個月內，一個月內就咁輕易搵到個買家接貨，仲要高一倍價格以上，好奇怪！如果你有放物業都知，首先，而家等個真買家都難；好啦，等到真買家，佢會睇住你買入價嚟砌，真係唔要你蝕返一兩成都唔會接你貨。唔難理解，而家熊市，我接左你貨要坐好耐，好高風險架！唔折讓我真唔制！住宅如此，商用舖位更是。

而家又唔係轉角市，要轉角都住宅物業同甲乙級商業單位轉先啦，喺毫無任何市場起色下，個劏舖你十萬返嚟，我知你知大家知，新聞紙都有講，咁我要咁喉擒一個月內用倍多價錢幫你走貨，而我自己就坐艇！？有咁疏爽既客！？

比著我，要我買個死場劏舖都唔知愛嚟做乜，租又唔係（賣淘宝野或挾公仔既檔口都唔吼）自用又唔係，仲可能月月有管理費要交，真係仲虛無過買隻layer 2 原生幣。要咁接貨，我真寧願0.07 接$ALEX，起碼唔使一個月，都上返0.14 。

呢d短期賺錢個案，我真唔明！