物業交易陰陽合約,遲早闖大禍!

2024 年 6 月 10 日 | 千語德財

如果當下我想置業,我必定會避過那些高回佣物業,我真無咁儍!

風險一重又一重,好容易因一時便宜或方便,令自己招致損失或身陷法網;大佬!我買樓啫,無必要同你發展商同地產代理一齊癲,發展商你係平就直接平比我!做乜比我咁多工夫要跟!

首先,我地為防地產代理唔回佣,必定要間代理簽返張回佣紙,呢張紙不能馬虎,如果係回佣三成,一千萬回三百萬bor,直情上得律師樓簽啦,我地無可能求求其其比個代理簽張紙就算,起碼要主管级代表公司簽,公司大印當然要有!咪求其百幾蚊整個印蓋過就算!要有法律保障,你話咁唔夠煩氣!?

好啦,跟住同銀行申請按揭,大家買樓既,真係要堅定心志,同銀行講你有大回佣,咪瞞住唔講,因為虛假申述,係會犯法既,唔好以為你唔講就無人知,你簽左張回條佣纸架,隨時個地產代理唔老泥你,日後過你一棟都唔出奇。呢方面你真係要好好克制貪念,如實報價比銀行。

第三,你點知發展商會唔會賴皮唔比,唔好話唔會,恆大大大間都可以走數。如果發展商最終唔比呢個佣,你可以做既就係旨意代理去追,但唔通要代理上court 幫你追,律師費邊個比,佢睬你都儍。到時你係買家就慘,回佣嗰舊錢先透支比左發展商先,然後望穿秋水等佢比返,一個回佣三百萬,十個三千萬,一百個三億,細發展商真係隨時可以走佬唔比!你吹得佢地脹!記住,經濟出事時,乜野都可以發生!

回超大佣實在太多灰色地帶,好凶險!我做乜要配合你發展商做大戲?你要托住個面價,關我鬼事,我嚟買野jar bor ,點解搵我祭旗,我先無咁笨柒!

你話係嘛!