你的子女別讀錯科 —— 未來商科人才不值錢！

有舊生的兒子要升高中，他問我選修Econ 和BAFS 好嘛？我說：「從抵唔抵考嚟講，我認為真唔好讀BAFS ，太多野要讀，性價比極低！若你仔仔有興趣讀就咪阻佢，但如果佢都唔知自己想點（通常都係架啦），呢科唔好揀啦，大家都係想拎個5 入大學啫！做乜咁老襯，搵科讀得咁辛苦既科目嚟考！」

「咁Econ 呢？」

「呢科可揀，勝在一打通個學理，唔駛點背點讀都可以考得好！抵！」利申先，我已經好唔願幫人補習（因為湊仔湊女好勞氣好傷身），所以叫呢位舊生個仔讀Econ ，絕對唔係想幫自己𢱑生意。

「都係！讀Econ對佢將來都有用。」

我說：「唔係bor！呢方面真無用！」

今天讀Econ，真的純因易考高分來爭入大學，而與子女的生涯規劃，我認為絕無關係，隨時教壞腦。

你用econ 所考的內容看當下世界格局，你該會好迷惑。Econ書本說市場具效率，不應干預，但現世界各國政府干預成風；書本力申自由貿易好，但當下大國卻在貿易設置重重關卡；我認為最離譜既係，明明書本告訴我們廣泛為人接受的交易媒介就係貨幣，過去十多年，比特幣已發展到不只是小眾所接受，該是貨幣吧！但居然有些經濟學家大聲疾呼，說比特幣沒有政府背書，所以不是貨幣，價值遲早歸零；但近一年，就因大眾的共識迫得各政府要為比特幣正「名」正「值」，我係學生，修Econ，真會慘叫！媽呀！我真的很亂，究竟我高中讀Econ讀左D乜！同現實世界差咁遠既！

究其實，是今天econ所考的內容，out 晒！是過去70年的產品，這70年，世界各國透過貿易在相互融和，步向全球一體化，所以重市場尊自由通商；但合久必分，現在鐘擺已在另一個極端：政治主導，各國力倡國家安全，對自由貿易諸多設限…….

於是，未來社會對通商人才的需求，再不會像我年青時代般那麼吃香；我那時代最吃香的科目，就是商科。

現在，懂商業分析不是沒有用，但AI 亦懂，昨天，才有位舊生幫我問AI，Nvidia 有無機會入道指，其得出的分析井井有條，除了有一點是錯的，但幾年後的AI ，我相信已經不會再錯。

換言之，懂經濟與投資分析的人，除非你對世局的前瞻性極強；否則，你在未來的勞力市場是可有可無的。

「那該讀電腦和資訊科技？」我這位舊生問。

當然！我認為，姑勿論你的子女對這科有無興趣也好，讀得好唔好都好，有一定的基礎認識，對他們的未來，定有幫助。