買港樓自住,幾時最好?

2024 年 4 月 23 日 | 千語德財

不太理解,網上仍有人教如何投資香港物業,要注意,係投資bor!唔係自住,前者要講回報,而物業投資的回報重心在於其升值。換言之,教你投資物業既人,係預期香港樓價有上揚的可能。

你總不能如此阿Q精神,講比以前買平左幾多就當賺,若樓價仍持續下跌,低處未算低,咁你點平買返嚟都好,始終都係蝕!

而我當下認為,香港樓市仍要持續尋底;而且,觸底後亦不會急急反彈,會橫行一段好長好長既日子,最樂觀都要十年,悲情既話,好似日本咁長達三十年,都未必唔係無可能。咁香港的住宅物業,就真只能拎嚟住,買嚟投資,就要有好多年扯唔上關係咯。

我絕對明白,我呢個觀點對好多港人嚟講,簡直係難以置信,咁多年嚟擁有香港住宅物業,係富貴的催化劑,我講物業已失去呢個功能,搵鬼人信!

咁長遠既事,真係去到嗰一日先知我係咪痴人說夢話。咁唔好講遠,講返近,過去兩星期,物業交易已經大大萎縮,二手又回復之前既景況,有d屋苑「復常」,每週零成交,你千其唔好話D交易去晒新樓到,新樓交易都縮。如果一手樓咁好景,長實就唔會將D貨尾狠劈三成求售啦。

而家景況根本同d地產代理頭頭先前預測既,絕對係南轅北轍。

如果今次樓市持續靜落嚟,政府都唔知仲有乜野招數催谷樓市,方法都真係好有限。

唯一令樓市有交投既,就係減價。

睇個勢,由最高位跌五成,已經不是天方夜譚,我估計明年年尾或後年年初就到。

有舊生有住屋需要,問我幾時入手好,佢地不求物業升值,但求買左個物業,唔好跌價就好。

我覺得明年年底入市較穩陣。