投資日股，跟美股好唔同！

三十年嚟，日本就好似一個心跳極慢既人，無氣無力，經常休黑，即使狂泵血液，血壓都推唔到正常水平。

點解？因為泵入去既血好快就流返出嚟，根本就停留唔到喺日本本土。事實上，過去日本印幾多銀紙都好，國內既人根本無興趣借，因為借返嚟既錢無論投資股票、樓房或實業，都要蝕錢，咁借嚟把鬼咩！

所以，d錢最終借左比外國人做Carry Trade (利差交易），外國人以低息借入日元，然後買入並持有較高息口的貨幣如當時既澳洲紙，賺取兩者間的利息差異。咁你話，日本經濟點會好！

但今時唔同往日啦，大量長期資金擁入日本，有入血，無出血，而呢d長期資金分別投進日本各產業與及主要城市既樓房度，即刻谷起左嗰經濟；最重要係出現返溫和既通脹，物價水平終於常態返，利率亦因通脹而有上升的空間，外國人又做唔到Carry Trade ，結果d錢留返晒喺日本，而且終於有用武之地，d人願意借錢，經濟就開始暢旺起嚟。

物價已有升幅，而家日本最需要既係人工追返上嚟，所以，我認為日元今年內勢必破6算，入口原料唔可以再貴啦，要平！咁企業先有成本空間加人工；加上咁多外資入嚟，日元絕對可升值，只係日本政府唔想升得咁急，仍希望維持平日元刺激外需，但勢頭已經唔容許咁樣，日本需要有序地放手比日元升值。

我過去半年都一直有硏究d日本上市企業，坦白講，我始終覺得日本人做生意有d傻，如果入手個別股票，我寧願買美國d科技股，但外資的湧入會散落到日本股票各板塊度，定必推高大市；個人認為，投資日本股票，應該係買大市而非個別股，跟投資美股唔同。

好彩今日個telegram群組有舊生提到，原來港交所今日有新日經ETF 買，叫「南方東英日經225指數ETF (3153）」，正！又多一隻買日本大市的工具！

等我留意下佢貼唔貼價先，有分享我就再post 文！