美國會再量寬嗎？

這兩天發文均圍繞我既一個頗極端看法———世界要面臨一個世紀大蕭條，舊生們比足面子我，對我既睇法既尊重甚至相信。

但相信還相信，舊生都有佢地既睇法，甚至疑惑，由此向我提問，其中一位問得有意思，其內容如下：

「如果真係嚟個大蕭條，其實美國經濟最終都會受影響，出口應該首當其衝？ 如果美國唔掂都會印錢。

再者如果歐爆既話，美國有無incentive 印錢去support 佢d所謂盟友呢？」

回應第一段，這正正係我近日文章不斷強調今回風眼在中國既原因，2008年金融海嘯，肇禍者係美國，美國才會狂印銀紙，而當時美國都怕咁樣做令美元貶值，紛紛派出政治要員到各國勸服大家一齊印，以免因美元大貶值大家一鑊熟，始終美元係世界貨幣，好多國際交易都用美元，個個國家都要配合下；歐洲當時正面臨歐債危機，當然樂於狂印銀紙，而派到中國就係克林頓嗰老婆，傾完後，中國就開始「四萬億救市」，狂起鐵路，內地企業和地方政府進行大量借貸，當時就有好多美金借入內地，由此中國手上多左好多美元，中央於是買美債來做外匯儲備。

美元債亦由此而起。

而家，係中國出事，美國有需要狂印銀紙？除非呢d美元債影響到美國金融制度的穩定性，否則美國一定唔會出手，至於出口收縮，好小事，並非「系統性風險」，美國經濟承受得起。唔同既，美國出事係全世界都出事，因為美元係世界貨幣，一崩潰天下大亂；人民幣未去到呢個水平，中國出事未去到全世界一齊印銀紙配合。

至於第二段，啱呀！歐洲出事，美國會出手幫，但係咪要美國好似2008年咁量寛呢？你咪歐洲印銀紙咯，最多美國印d借比歐洲，等歐元無貶得咁犀利，但絕對唔會係2008年嗰個規模；而且一定唔會好似上次咁印美元嚟借比中國。

反而歐洲可能會有小插曲出事：英磅可能會有d事，於是脫鈎議題又再成爭議。