租金上升難以持續

近一段日子租金的而且確上升左，但大部份都聚喺新樓嗰邊，同講區份（將軍澳、沙田大圍等等），因為租務需求的生力軍來自內地到港求學既大學生與及短期來港工作的人，佢地偏向租新樓，貪較易適應。至於舊區舊樓，租金升幅同交投沒有太多的增加。

如果你係本地的識途老馬，想租平，該去舊區舊樓度揀，會搵到d好住既。

訊息是王道，你得閒週圍八下行下，了解多d市道，你會發覺成個世界就係一個夜冷店，好多寳可尋；資訊可貴，既然係寳，我有荀野都唔會話你聽，自己食，所以你旨意人地推介就死，要自己勤力d去了解行情。等於你隔山打牛投資日本物業，等d代理推介，死得啦，人地好野日本人自己食左啦，到你咩！比得你一定係垃圾！

講翻香港租務市場，活躍都講季節性，而且又具波動性，我估計隨著香港經濟進一步轉差，對外來人才需求都減少，加上大學已快開學，踏入尾季，租金該會顯著回落。

樓市旨意租金回報難成氣候，尤其係香港呢個城市，港人買樓都唔係貪租金回報，係貪資本增值；你唔係老一代人，嗰時平買翻泥，又唔駛比咁多類別既印花稅，而且咁多年後的今日，已供斷，佢地將單位放租，租金回報係好高，十幾釐都有；但新樓咁做，搵嚟攪！七除八扣d管理費、差餉同地租，剩翻都唔知夠唔夠供樓，息口又不斷加，好彩有呢批外來新力軍入嚟撐住租金，唔係d新樓業主都唔知點頂。

租務多左，代理佣金多左，但呢d收入濕濕碎，同物業交易的佣金天差地別，加上尾季租務會淡靜，加上一手物業好多發展商都唔願減價，難多交易，難寄望太多佣金收入，所以我相信嚟梗季尾，地產代理呢行應該有顯著收縮。

各行各業都在收縮。