解讀驗眼度數紙

每次驗完眼或者配完眼鏡，都會有張度數紙/卡，果堆字或數字應該點睇呢？

首先第一點留意係，全世界應該得華人係會用幾多百度黎形容自己度數。度數的單位，應該係以Diopter (D)為單位，1.00D就係我地平時講100度。而家鏡片製造商造鏡片時，鏡片準確度可以到0.01D，但我地的眼睛度數，就以0.25D (25度一跳）。

拆解下果堆字點睇先

第一個Sph (球體度數），就係我地近視或遠視度數，正數代表遠視，負數代表近視。請留意，遠視唔代表老花，遠視意思係我地睇遠的物件時，影像會聚焦係眼睛後方。

第二個Cyl (柱體度數），係我地散光度數，大部分的度數紙（超過95%）都係用負數，只有美國才比較多用正數。又留意散光都唔係老花，散光主要成因係角膜在弧度不同而產生的，無散光的角膜就像一個球體，而有散光的角膜就像一個欖球,其中一邊比另一邊弧。

第三個Axis(軸線）係散光角度位置，由1至180度。

第四個near add,呢個就係老花度數啦，老花就係因為隨著年齡增長，睇近的聚焦能力逐漸消失，而造成的閱讀問題。通常在40歲左右出現，最深去到300度左右。

有部份度數紙可能會提供Inter add，呢個度數係針對電腦的度數，因為我地用電腦距離，一般會比閱讀距離較遠，純老花度數太深令佩戴者看不清電腦，所以如果有些老花患者需長時間使用電腦，可能就需要電腦專用度數。

我已經係青耆，亦要常望住電腦，上段最尾幾行，我好有感覺！