咁樣買日本鋪，我都唔知咁算唔算比人搵笨！？

我有位舊生想投資日本物業，台灣信義物業代理比左個商鋪盤佢，睇佢有無興趣，其中一個盤叫價1045萬港紙，但我地查察下日本當地同一個盤年頭既價錢，叫價係825萬左右，半年升左25%？！有無咁誇呀！？裏面agent 有無古惑野，真係無人知。

隔洋買物業，大家真係要小心d！

仲有，呢兩個盤都係喺東京都23區的一等地，雖然地點一流，有穩定租客，但以44年樓齡來說價錢係偏高。而樓齢亦都係呢兩個盤最大嘅隱憂。1979年建成，即係用舊耐震基準（耐震程度去到震度5級）如果之後有做到耐震補強還好，冇嘅話你就唯有求神拜佛唔好有大地震發生喇。

同埋一定要check清楚大廈的維修紀錄同「修繕積立金」個pool有幾錢，睇返棟大廈之前有冇進行過大規模修葺。如果冇的話就好有可能喺未來幾年內要花一大筆錢修葺。如果修繕儲備金足夠支付就問題不大，最慘係個儲備金唔夠錢，咁會點？一係就業主夾錢，一係就選擇唔做任何維修工程。但呢個只係拖延時間，最終呢一日都會來臨。同埋要諗下打算hold幾耐，假設10年後放，到時已經54年樓齡，有冇人會接手？又或者中途需要清拆重建又點算？