都唔駛日日做樓價跌既防火演習

基本上，我喺youtube講樓市跌，就有不俗收視，甚至會有好多人subscribe …..

不過，我已經開始抗拒講樓市跌。

樓市跌已成勢，也不用多說，除非跌市之中結構有改變，譬如由納米樓災慢慢蔓延至正常樓，又或跌價既結構又再改變，如新界樓再由均價$13800下調至12000，否則，不斷講樓市跌跌跌，好無聊！

舊生說，對當下樓市格局還有人認為樓市「點會唔升翻」，感到驚訝，其實真無乜特別，市場總有睇好睇唔好既人，重點只係比例上既分別。跌市時，睇好既人比例少d，但唔係無，無就樓市已經跌到好深囉，好似廿年前沙士前後咁，但樓價再跌就一定有人要。

同埋立場而言，你有樓喺手，或重貨，主觀意願下當然唔想講樓價跌或聽到人地話跌。睇youtube d人鐘意聽我講跌，多少可推斷到受眾一群的持貨背景。

對於一個打算digital nomad 既我嚟講，未必常在香港，當下的樓價仍真貴；我條數係咁計，當我有80歲命，距今比盡25年啦，每月住酒店，當12000一個月，係360萬，咁而家d樓重好貴，唔好忘記，住酒店你唔駛交管理費、差餉同地租、水電媒、和維修費，係要花心思做下d身外物既安排啫；不過，今時今日科技發達，連財產也可以在國際上隨身帶（我指比特幣），要做到不滯於物，不難！

所以我理得他人覺得樓價會升跌與否，總之，樓價跌到可以做我喺香港既安心立命之所（計埋政治體制既變化），我咪入咯！

當下，我反而想欣賞下d新盤既設計，最近黃竹坑站上蓋海盈山，有太古、信和同地鐵等等參與起，係我最有好感既發展商，倒想看看佢地既物業設計，點開則面向東南，內園點佈局同大型商場既安排。

天天只講樓價，響警號，亦真好無聊！真係嗰句：「知跌啦！」

都唔駛日日做防火演習既。