那個荒謬既高考補習年代

我有位舊生，是我九零年代尾的學生，他也四十出頭了，人生閱歷豐富（當然，我所有舊生都係），有次，他跟我分享：「Sir，你唔好對號入座呀！其實那個高考補習年代，外行人睇d補習老師，就係：乜柒都唔識！」當時我是跟他在telegram 對談的，我聽到他這樣說，哈哈大笑起來！

因為我好有共鳴！

說實在，九零年代那十年的補習風氣跟二千年後是有微妙不同的，也許是互聯網存在與否的問題吧！我頭十年補習，即九零年代，未有互聯網，補習市場很「靜」，各自各做，少有是非，而當時我地做補習，大多也明，搵食啫！談不上被崇拜。偶爾有學生欣賞我們的教法，感謝他們口耳相傳的推介，令我們多些生意，就是這樣而已。

那個安靜的時代，不存在補習明星，最多也是欣賞老師盡心盡力的教導。

然而，踏入二千年後，互聯網興起，令補習老師的名字天天在網上討論區出現，相當矚目，令新一代的補習老師，視自己為半個明星，要個個補他們的學生成為他們的粉絲，有些甚至要開宗立派，人前人後口裏常掛著門生前門生後，仲有個派別名比佢地，譬如我叫Alex ，學生就叫Alexian ，好無聊！我曾有學生，受當時這種氛圍所影響，想咁叫我，我帶著恥笑好認真咁同佢講：「乖！唔好咁低能！」

我心諗：「大佬！我出嚟搵食啫，要錢！無興趣做一派之主。」我始終係老一蛻補習老師，唔係咁接受二千年後呢d呃細佬無知天真的手法！

其實，我地提供教學服務，你覺得物有所值，咪得咯，唔駛當我偶像。補習老師大多其貌不揚，有d個樣仲好似有蒙古症咁，有鬼資格做明星咩！四份一個都談唔上。

但嗰個年代d學生，偏偏會受呢套，佢地d說話，我聽到都噴飯，話邊個邊個補習老師好好，上堂教埋佢地做人道理；呢d 學生既feedbacks ，我真係覺得莫明其妙，明明班友一畢業就出嚟做補習，見過既世面極少，憑乜資格教學生做人；我自量呀！上堂過場只會講笑話娛樂一下大家，至於人生道理，我今日重學緊，唔曉教人！

那個年代既補習老師，10個有9個係井底之蛙，學生跟他們學人生，是跟蛙蛙看天下。

教考公開試我地就叻，至於點做人，不少中學老師為博升SGM，手段仲叻過我地，更何況在商界混的人，我地根本就乜春都唔識！

所以，嗰時我每每聽到學生呢d說話：

「我有幸上到乜乜既堂！」

「乜乜真係我恩師！」

「阿乜乜好好人！」

我心諗，你地比學費架，我地交足工夫係本份，有乜野大小確幸同恩乜師呢！至於我好唔好人，呢句真係超幼稚！各人有各自的立場與利益，有好人分到出嚟既咩！同埋，我好唔好人，關你鬼事咩！我教到你考好公開試咪得咯！

可能你嗰時都天真過，接受過呢種畸型的客服年代。