近大學區段既物業租值可睇高一線？

香港既物業似乎已令內地人失去興趣，但仲有無野吸引到內地人呢？有！就係香港既大學，特別頭三大。

我呢年成日同d 香港DSE 學生講要勤力d啦，通返關後，會有好多內地人落嚟同佢地爭學位，用DSE 成績爭又好，用其他入學要求爭又好，連香港考試局喺廣東都安排左試場，大趨勢就係會有一批內地年青人心儀香港既大學。

好合理吖，比我係內地生我都會，喺國際大學排名嚟講，港大排三十幾，喺中國範圍，只係僅次於清華同北京大學，嘩！大佬，後者呢2間大學幾難考入！真係爭崩頭，幾勤力都未必入到，但嚟香港爭頭三大大學學額，就容易得多，喺國內同國際既排名又唔低，點解唔過嚟讀！

再加上香港有一大批原本讀中名各校既細佬都陸續移居左，佢地由細到大既教育環境較優，係真叻d既，而家又唔喺香港爭學位，令內地生嚟爭香港d大學學位，成功率又高左，相對國內兩大最高學府，真係有較高既「性價比」。

事實上，內地生佔香港既大學學額既比例，每年俱增，喺大學校園聽到普通話溝通，已極常態（再加上好多中學學生都係由內地移居過嚟，本身普通話就係母語，上左大學後，友間閒談當然都係用普通話啦）。

呢個趨勢，令近大學區段既物業租金稍為有支持，因為d內地生無香港身份證，加上佢地只係細佬，無入息證明，業主通常都要求一炮過交曬成年租金，於是就有好多報導話嗰d近大學既區段，好似將軍澳、沙田同大圍等等既物業，經常有內地生一炮過交租的個案，講到嗰租務市場好似好旺咁，其實都係要講區段同季節（入學階段咪旺d咯），叫做好租d，但有好多其他老區段，租務市場都係普普通通，正常不過。

但點都好，呢d區份既物業回報率都係2釐半左右，唔見得有顯著升幅，所以投資呢d近大學區段既物業，都唔覺有乜野優勢。

物業價格反映貨幣量寛程度，而物業租金就反映實體經濟狀況，以而家香港既經濟，租金上升動力唔會高，呢批內地生算做對香港租務市場提供一d支持力而已。