舊生！別「坑」我於telegram 投資群組中！

自從月前開了幾個telegram 群組讓大家一起討論投資事宜後，我發覺有些舊生好有趣，佢地本身已default 左某些投資態度或取向；然後，佢地會有意無意推我向佢地呢個方向走。

佢地既諗法，我睇得出，係網上那些推銷投資所育成既思路，出面d group 要吸引網民加入，甚麽每日一港股一美股，甚麼「真正正確」的投資方法，有豐富人生經驗既人或心水較清既人都理解，這是行銷手法，明白世人很多想搵快錢，若果唔係咁講，你點會肯交學費或者最戇居————科水比人「幫」你投資，佢地好多名目既，又眾籌又pooling，總之，就係想你比錢啦！

投資，根本由不得你搵快錢，只可以buy and hold ，等！等！等！耐心既守候，做長線的；我曾經說過的，有人曾經問我：「Alex，你估可唔可以一個星期內投資賺一成？」我的回答：「梗得架！」但後續那句往心裏說：「之不過你跟住下星期就輸翻2成啫。」我一向反對短炒，大家要對自己坦白，你突然想「學」短炒，學乜鬼吖！你係想過大海賭，但又唔想成日搭船怕暈浪，搭直昇機又覺得貴，所以想短炒股票，其實係有鋪賭癮出現，你不如直接講你想賭錢啦！重要美其名叫投資，自欺欺人。

大家要明，如果一個甚麽公開群組，可以每日一股令你短期賺錢既；首先，我做乜教你！？大家成年人，咪天真，我無著數做乜益你！我賺錢咪自己繼續靜靜地賺落去咯，我做乜話你知！？我賺夠？賺到要上深水埗舊樓天台掟錢落泥？咪儍啦！

第二，若果真有這本事，我真係唔怕收你學費，嘩！你賺硬架bor! 我唔收你錢，我儍架咩！如果我唔收錢，相等於一個超索之女站在彌敦道街頭任由男人蹂躪，會有既咩？有你都要小心d，一定事有蹺蹊，當心你在拍緊AV，上鏡了，是廿四小時以一敵千的息影戰。

偏偏就有些人生經驗不足的舊生，就抱住呢d觀念入我的telegram groups ，期待我咁做，請不要「坑」我，我無呢d「短期」爆炸力的本事，我一向持久，打開長期戰，鬥長命，門屁股坐得耐，買一隻野，我可以等佢二三年，甚至更多年，我肯等。

財不入急門，你搵錢就難，錢搵你就易；但要錢搵你，你首先要播下種子，然後等它來找你。

我們的telegram 投資groups，是積累了一班有投資體驗既人，相互分享自己的心得，大家以資為鑑，從中領略投資人生既大道理。

我人一個，可以經歷幾多，這些群組，碰回各人的經歷，由此互相提點，對各類意見我們要兼收並蓄，取長補短，不能盡信，從中理出適合自己的投資人生。

我也只是當中的學習者。