點解買納米樓係搵自己笨？

今日屯門青山公路有新盤推出，其中一類單位實用面積只得206平方呎，是名符其實的納米樓，售價最低184.2萬，好似幾抵！釐印費又只得100元！

見仁見智，我就再平都唔敢買。

好多時下年青人買樓，只係諗當下夠唔夠住，夠住就去馬！但買樓咁重要既投資，你真要規劃遠少少，譬如倆口子突然多左個B B出嚟，咁點安排住呢？如果係兩房單位，就有得伸縮啦！原本既書房就可以闢出嚟做BB 房，變動唔駛太大都應付到，就算B B大過左，都仲可以有房住，就算多一個B B，都仲可以上下格床，頂得住；始終人有三衰六旺，唔係你話要搬大d就可以搬大d，而家個單位可以彈性處理就最好。

唔好講B B，就算你想養隻狗仔，都有位放佢d野吖。

如果係一房單位，個B B已經要訓廳，大個左就更加唔掂！但起碼都守到幾年先要轉大d。

納米樓就頭痕啦，有B B有狗狗都好，你都唔知點安置佢地。所以，納米樓喺自用角度嚟講，真係一d伸縮都無，好攞命！

咁投資角度呢！喺樓市極熊下，納米樓根本係垃圾！點解？如果你而家可以288萬買到個2房單位，兼有能力買，你會唔會貪平用188萬買間納米樓？買左好快唔夠住gar bor! 到時又買過呀，大佬！熊市嚟架，轉一轉手又唔知蝕幾多？咁我買納米樓咪搵嚟蝕同搵嚟煩！？

你識咁諗其他人都識咁諗，咁你有間納米樓想成功放售，唔狠劈價都唔使旨意賣得出！咁咪蝕到眼坦坦！甚至乎，好長時間放喺度都無人買！

其實，幾年前納米樓出現時，好多人都話買呢d樓超高風險，無乜保值能力，但嗰時d人恨買樓恨到儍左，但又唔夠錢，所以納米樓照買！

買左而家梗係知甘啦，四成樓值肯定已無，下半年應該要無多一成！真真正正貼錢買難受！