點解短炒搵唔到食 ?

我一向好厭惡「短炒」呢個名詞，亦唔相信呢種方法能夠獲利。

我地必須要明白短炒同長期投資係兩種截然唔同既野，尤其係我地面對既對家，真有大分別！正因為咁，會直接影響你獲利的機率。

短炒係零和遊戲，譬如你炒甚麼所謂「即日鮮」，咁你贏到錢，即係有人輸錢比你啦，一加一減必定最終打和。試想想，你要人輸錢比你難唔難？難！我做乜要輸錢比你，喺呢種「對賭」心態下，對家絕對唔會成就你，而你亦將心比己，都唔會成就人地，咁你話呢種情況下贏錢機率有幾高呢！

亦正因為我咁既思路，每當有人同我講某某網上專家教點短炒，等大家一齊賺，我心裏的回響就係：「個個短炒都賺咁邊個蝕？」

長期投資就唔同，因為牽涉時間，時間會令一間公司既本業成長，市值由此而上升，比錢同你買股票既人，佢唔係同你對賭，佢地係睇好間公司前景而買某隻你有既股票，咁只要間公司係好野，佢絕對樂意比錢，佢唔會理你賺幾多，真唔會斤斤計較，於是，你賺錢機率就高好多，所以，我地長線buy and hold 策略只會關心企業既長線實力。

咁你可能會問，咁唔比我短炒嗰一刻遇上長期投資者架？咁佢咪肯比錢我咯！問得好！真係一條好問題！你短炒嘛，日日炒架嘛，日日碰上長期投資者？咁犀利？一年三百六十五日日碰上，即係起碼要有365間上市企業輪流日日被睇好，重要你每日都買中呢下勁，你諗下有無可能！？真係難過中六合彩。

更何況企業成長要時間，點會日日都有焦點公司！我地投資，唯一可做既，就係默默地守候。