香港的投資氣氛真係史詩式低迷

當下香港的投資氣氛，真係好低迷，低迷到，你想寫投資分析，都無乜野好寫！有時都好佩服d財經網媒，仲可以日日跟進港股升跌，比著我，就真係無乜心機寫，自從美資撤離香港股市後，股市基本上無乜動力，只係持續陰下陰下咁跌落去，唔通升小小又噏餐死咩！真唔知有乜野好討論。

好似樓市咁，講真我喺youtube 講樓市真係幾好收視，每次講都有人subscribe ，試過有段片成百人subscribe ；相比我拍編程片，真係一片天堂，一片地獄，相差幾十倍效果，但我真係無乜野好講。香港樓市，一言以蔽之，半生不死！生佢又無可能，因為未來有龐大供應，五年內有近十萬個新單位，點升！？死佢亦無可能，因為好多業主已供完物業，唔憂賣，叫價企硬。咁你話，升又無可能，跌又跌唔到，乜野活力都無晒，樓市處於長期悶局，死水一潭，個池游嚟游去都係嗰幾條魚，有乜好講呢？愈講只會愈無聊；我投降，寧願出編程短片，起碼夠實用。

至於香港成個經濟，就更加唔只塘水滾塘魚，係不斷失去池水，最強消費力個班歲群，移居外國既就移居，入內地工作就不在港；大假大家去日本遊玩，短假上大陸消費；買野，無論零售或用家自己，都係喺淘寳進貨，咁香港仲剩返幾多本土消費力？呢個城市既商業仲有乜野可為？

至於打造香港成為Web 3.0 大都會，似乎JPEX 事件後，靜曬；證監唔敢太放，攞左牌既加密平台生意都係兩閒，除左賣買下比特幣，都無乜野可以做。去中心化既實際科技開發面香港又缺乏，長遠而言，Web 3.0大有可能最終成為市場不聞不問既產業。

香港，真係好靜！同好剩！

剩到只得一份緬懷江南繁華般的孤寂詩意。