銀行根本唔願做按揭貸款 ——— 而家買樓買得好辛苦

買樓咁大件事，唔到你唔有d迷信，我有個朋友就極迷信，只要打算買某個單位，佢就開始好留神自己的日常，如果諸事不順，佢就會覺得呢個deal 可能唔適合佢，要放棄。

而我，但凡有一D重要抉策要做，因為有好幾次呢種經驗，我會特別alert，就係只要去銀行櫃員機入錢，若比格機食左錢，我就會認為係signal ，個抉策係錯既，最好唔做。

你唔可以否認，如果你做對了事情，過程中一切都會順順利利，你係會有感覺既！一旦做某個決定，你經常心煩氣燥，你有得揀既話，就最好唔好做啦。

而家買樓，我就覺得好辛苦啦！

首先，你同發展商買樓，會怕有優惠你無拎到，最緊要有無現金回佣先？如果有，我又係咪拎少左呢？大佬！當下回佣可以以一成兩成咁計，你估小事咩！我至驟忌蝕底嘛！咁呢d左猜右度，唔辛苦架！

第二，而家銀行唔恨做按揭貸款，你同銀行申請，真係好似做錯事咁，要等待被發落！個申請可以拖你好耐，真係whatsapp 問下估價都好似唔想覆你咁，跟住無聲無氣一排，一有消息，就係要你左補交右補交d乜野資料，你就空著急得嚟又極擔心，怕一旦批唔到搵唔切其他銀行就大鑊啦，比發展商殺訂不得只，仲要追差價架嘛！呢個階段絕對係一種折磨，如果你仲要申請按保，仲煩，又擔心按保嗰邊估值過低，又要抬錢！總之，一萬個擔心，真係抑壓症都藕出嚟！

話就無壓力測試啫，但銀行唔想借，一樣好多野難你，難到你懷疑自己係咪做左一件人生大錯事。

買野，應該係一件好開心既事；但而家買樓買得咁辛苦，除非你焗要住，否則，點解要而家買呢！？