還以為自己推斷錯了今年iPhone 炒勢

過去三年，因為疫情令Apple 既 iPhone 生產線難以常態運作，原材料供應錬又經常被打斷，尤以晶片供應為甚，令九月推出的新iPhone Pro 系列，炒勢可持續足足一季，相當好賺。

所謂好賺既意思，基本上Apple 週五預訂iphone 嗰個鐘，真係合埋隻眼訂就得，但凡Pro Max 系列，有貨就即按，顏色甚至收貨日期基本上都不用在意，即使去到11月尾取貨，都仲有得賺。

但今年我見所有生產線已復常，iPhone 供應該非常充足，而Apple 今年部iPhone 根本就係一部「過渡機」，為準備明年摺機熱身，賣點不太吸引，加上內地經濟放緩鮮明，所以我認為今年iPhone 無得炒！所謂無得炒，當然唔可以抹殺頭幾日有得「執下」，因咁多年嚟頭幾日總有d溢價（最差嗰年2018年頭幾日都有得賺既），但我認為唔會多，大概500-1000左右吧！最重要係炒勢不長，唔好話兩星期，一星期都未必有！

然而，開賣前幾天，先達已流傳非常高既收價，一部Pro Max 256，真係閒閒地執$3000，我當時想，難道我推斷錯了，而若錯，我諗錯邊處？

嗰幾日，傳有新買家進場———俄羅斯人，推高了炒價，但觀察開買頭一兩天，見內地收價跟先達收價相差不遠，跟過去幾年無大分別，這理由就顯得不太充份。

我心想，難道我眼光太差（這方面我鑑賞力又真著實不高），原來今年呢部機超優質而我不知，且我高估了內地的經濟衰退與及內地人對iPhone 既盲目熱情？

正當我認為自己今年推斷iPhone 炒勢要大錯特錯時，iPhone 炒賣到第四日，形勢卻大易轉起來，聽先達場內朋友說，有「超級大貨到」，供應多到Pro Max 收價即大跌，甚至如果你早期訂了512 藍色，現在要損手了！這現象不尋常，因為過去三年，Pro Max 256 和512在開賣的首個多月，乜色都賺，點會開賣第四日開始有某隻色見紅！

千規律萬規律，原來首三日熱妙，還是供應未來得及，一旦大貨湧來，收價就如雪崩般急鋤！

看來今年炒勢不強，十月初取機既你，可能要預蝕，但我覺得不用cut 單，如果你訂既係原色，不妨放手一搏；即使非原色要蝕，也該蝕不到你cut 單要扣走既那筆數目；當然，如果係十月中單，cut 單還可以不扣15%，就免心煩寧不要貨倒好。

既「訂」之則安之，蝕極有限，咪當過去幾年賺左有少少回吐咯。

明年出摺機才大報復吧！