談談南韓既一位攝影師 —— Cho Gi-Seok（조기석）

時至今日，攝影係功能上已有明顯既演變，如果只用傳統攝影觀念去審視當代攝影，難免會有所缺失同片面。唯有瞭解箇中原因，咁先有效進一步理解當代攝影。粗略黎講，自1960年後，除紀錄外，攝影亦被用作為一種自我表達同思考既一種媒介。今次就為大家介紹一個92年出世，來自南韓既一位攝影師 — Cho Gi-Seok（조기석）。

當我地談論到韓國既（時尚）攝影，Cho Gi-Seok一定位列其中。原職為設計師既佢，因工作關係經常而接觸攝影，逐漸對攝影產生興趣，從而開始左佢既「攝影之路」。因為曾經中途輟學既關係，所以佢認為自己必須要比同輩大學畢業既人更加努力，加上，出對於「美學領域」既好奇心，亦促使佢係各藝術範疇，例如：平面設計、佈景設計、藝術指導、影片製作等遊走同創作。基本上，除訓覺之外，其餘時間都係工作，就連週末都一樣。佢對藝術既熱愛同持續不斷既努力，令佢係短短幾年間成為各大著名時裝品牌都爭相合作既攝影師。雖然佢年紀輕輕，但其作品除左係國際上已有一定既影響力（著名流行時尚雜誌VOGUE 11月號既封面，梁朝偉輯相就係由佢本人操刀），亦係行內獨一無二既靈感來源同審美參考。

對Cho Gi-Seok黎講，攝影最獨特既地方在於，佢係一種綜合事物既媒介。Cho Gi-Seok認為攝影係視覺既中心，亦係雙眼既延伸，即使將所有歷練同想法放置到鏡頭既世界裡，仍能達至一種包容同協調既狀態，正因如此，佢鐘意將日常矛盾、對立既元素雜糅、融合。除左呈現出對立事物當中表面奪目既一面之外，更透過呢種離奇擦撞所產生出既平衡，試圖表達一種共存既觀點，將作品敘事性推往至更深處。

為左能夠準確咁表達腦海既想法，佢開始左自己既拍攝。擔任藝術總監期間，Cho Gi-Seok經常接觸好多唔同類型既攝影師，日子耐左，佢覺得好難可以準確地向其他人表達自己想講既野，所以決定唔依賴他人，透過運用自己係多元藝術領域方面所訓練出黎既技能，尤其場景佈置，決心要創造出屬於自己既圖像，繼而踏上左佢既拍攝之路。

我地可以先回顧一下佢2014年所創作既《Fake Self-Portrait》：

《Fake Self-Portrait》係佢早年創作當中，較為人熟識既作品，亦可以用作為理解佢創作意念既始點。以「自己房間」為概念基底，透過佈景加入迷宮圖案，將人同空間融為一體，而黑白既運用可以營造出一種黑暗、怪異既氛圍，佢心底里既一個意識空間，藉此表達自己曾被人欺負，人前人後兩個樣既呢種矛盾心理、虛偽同假裝。

Alex@Kerwin