要做投資大家，點會無經歷過炒期指！

你睇好比特幣，投資佢相關既產品有好多方法，其中之一就係買比特幣期貨ETF，好似3066，但我發覺好多人根本無視「期貨」兩字，當佢「實貨」咁買，好安心….. 其實咁真係懶，亦好危險，輸左都唔知點解！

你買一兩次3066梗唔覺有問題，但你必定會食髓知味，一定唔只一兩次，仲會再買，如此下去，總有一次賴野！所以，大家都係先理解乜野叫期貨，尤其係佢轉倉的風險。

但用理論解釋太抽象，我通常會叫人去買一次細期指，做一次跨月轉倉，你就明！

問題就喺呢度！大家一聽到期指，就好似聽到鬼故咁，好撚驚！

我老老實實同大家講，你未經歷過玩期指呢個階段，你投資既識見就有個「窿」，呢個黑洞，會令你睇野失準。

等於我投資外幣唔一定要實買嗰隻外幣既，我可以同人「掉期」，無呢個認知，你睇外匯又失準！

我懷疑，市場就係驚太多人玩期指玩到聰明左，所以有心將佢「妖魔化」，等大家投資眼光永遠上唔到一個水平，長期輸錢！

我唔係叫你沉迷玩期指，係叫你實實在在見識一次而已！好過買本書嚟睇，睇極都無感！

3066 風險在於，萬一比特幣急跌，轉倉時，佢既價就會跌得相較比特幣價格更甘；另一方面，如果跌突曬所有按金（呢個唔駛等轉倉），有關金融機構係無義務要補倉既，咁3066就歸零！

唔明？明天買張細期，7月頭轉一次倉，即刻明曬！然後以後都唔玩。

我老豆曾經喺我初中時玩期金，睇住佢一晚輸到面青青，但自嗰次之後，我未見過佢再靑過。