英磅短期內難會貶值

朋友見我上次奇準地推斷英磅會跌至港元8.2 （又是我的YouTube 短片和有跟進這方面的舊生可作證），現時英磅不斷攀升，關心短期內有無機會回調，想平入些英磅。

短期內，我見不到英磅有下跌的壓力，上一次我推斷英磅會下跌既原因，係當時嗰位女首相儍更更，即位後竟然想大開水喉增加公共開支，慷英國政府的慨，但係人都知英國個底唔厚，三十年前已被索羅斯揭穿左底牌，你呢位女首相居然夠膽死替政府大破慳囊亂Fing 錢，又話補貼乜又補貼物，儍Q左，完全無財政預算既概念，所以市場會預期英國若真咁樣做央行必定要印銀紙填氹，息口亦無可能加，咁英磅點會有運行，唔跌有鬼！

但今次呢個新首相，安份好多，處理事情亦比較循序漸進；同埋，貶下眼，冬天已過，成功過渡能源價格飈升帶嚟的經濟大陣痛。於是，英國央行有半年至九個月時間可以專注返如何加息壓止滯脹。

加上近季度既英國失業率低於預期，就業數據有改善，與及其他經濟指標亦唔錯，經濟似乎不太「滯」，於是英國央行官員又可以專注返對付核心通脹，息口傾向鷹派立場；畢竟，英國的通脹問題比美國和歐元區嚴重，所以縱使美國放緩加息步伐，英國未必跟咁貼，仲會加！

咁英磅會唔會因為加息再升呢？我覺得唔會啦，而家嗰水平差唔多，始終英國經濟只係改善左，唔係完全復甦，國際資金流入有限。

但至少未來半年至九個月，因為英國息口始終高企，我真唔覺英磅有貶值的可能。