而家買新樓一定要知有乜野「暗優惠」

最近香港既樓市，令我突然好好奇！原因係依我既計算，樓價應該開始要大跌，但依新鴻基新盤價單嚟睇，仲未到我認為要到既水平，我認為乜野水平？就係樓價約12000蚊一平方呎。

如果星期六呢個盤要賣得好，見唔到12XXX，係無可能！

所以我好好奇，星期六除左張價單列明既優惠外，仲有乜野「暗優惠」！

好多人以為減左價單上面既各種付款優惠咪得咯！錯！嗰d係「明優惠」，還有「暗優惠」。

呢d「暗優惠」，係你上律師樓簽必賣必買合約裏面d條款先註明，簽臨約時無寫，呢隻我叫「暗優惠」，日後喺田土廳land search 可睇到呢d details ；但亦有另一種「暗優惠」，連賣買合約都見唔到條款，係發展商先回給經紀，經紀再回給你，死味！

傳媒報導既，永遠係價單既「面價」或扣除價單上「明優惠」的「折實價」，而唔係再扣埋呢d「暗優惠」既「光豬價」，唔好睇小「折實價」同「光豬價」既差額，可以大到成2成。

我留意到，最近發展商開始「猛用」呢招，有好多原因，譬如佢地唔想咁明顯比同一新屋苑上一波買家知道交易實價係幾多，又或唔想比市場預期樓價已大跌等等，總之，呢招已經開始普遍。

雷霆係新地賣樓之神，我好有興趣知佢聽日點賣，會出d咩「暗優惠」。

我久未出現對樓市既好奇，而家返嚟啦！