老人家投資方面既處變不驚，值得一學。

做投資，我地真係要有獨立思考能力，唔好人地講乜你就信乜，特別係d媒體，東西方媒體都係架啦，都有問題，都唔會係真相！東方既可以因為「維穩」，就乜野都可以平常安康，極受官方所指導；而西方既，就乜野都可以「唯利」而製造恐慌，極受華爾街大鱷所操控。

我都唔知西方傳媒最近發乜神經，成日話美國經濟會出事，d評級機構又喊曬口話要降乜降物d評級；老實講，呢d評級機構有幾老實，心照啦！當年金融海嘯，就係呢班粉皮比d垃圾次按AAA級，去到爆煲前都唔肯改，而家懶主動降乜降物，都係配合華爾街d大鱷，想執平貨啫，我認為。

有時，我哋要學下d老人家，處變不驚；就好似呢段日子，香港係沉，好多年青一代睇死香港，但如果你留意d老人家，佢地好定，租單位比我嗰位老人家，佢好多樓收租，我有次問佢，點解唔賣d單位呢？樓價係咁跌bor! 佢對呢d睇法不以為然，只係講：「我而家咪幾好。」

其實我明白既，好多老人家，包括埋我老豆，面對各種社會和經濟風浪，佢地會依然故我，絕對唔輕易改變佢地既生活或投資「節奏」，堅守佢地既處世規律，唔會因一時既變局而自亂陣腳；而最重要，又真係比佢地既人生一個一個階段咁經歷過去，仲生活得愈嚟愈和順與富足，所以，佢地唔會輕率跟風去變。

有d老人家買樓，你問佢地怕唔怕樓價跌，佢地既回覆係「怕得幾多！」「我自住怕乜！」其實佢地既心態就係上面嗰種：我有我自己所定的路徑處世，我認為呢個價可買，跌我都會買，我唔會理其他人點睇。

記得好耐以前，電訊盈科股價係咁跌，我見我老豆有買開，我問佢點，佢都係好老定咁講：「我收息嘛，佢跌我咪繼續買咯！」

老一輩既思維就係咁；年青一代唔同，成日想變，變完就搵現象嚟支持自己的轉變，真係截然不同！

咁你會問，咁應該學老人家定年青人？

我點知！你自己消化下啦！立身處世，係大學問，自己吸收！