美股你咁樣玩法，邊有得輸架！？

世界就愈嚟愈荒謬，原則上股票價格反映企業營利，生意差就應該股價低，但經過過去十多年量寛之後，市場有新思維，就係經濟不景令企業營利下跌時，政府大有可能出手干預。譬如美國股市，經濟佳，企業生意好，美股股價當然升；但經濟唔好，企業營利跌，無有怕！美股照升，因為市場會預期美聯儲或放緩加息、或減息或甚至買債推量寬等等，由此美元流動性高左，美股又升，死未！

經濟好股價有實業托，經濟唔好股價又有錢托，兩極均升，反而經濟平平穩穩，美股先會回調。

細個讀大學時，分析股票有三層：第一層係整體經濟，第二層係產業分析，第三層先到股票的個別分析；我覺得而家要改寫，因為買美股可以省去第一層分析，直接跳去產業分析就得，而產業分析又好容易睇，美股當然一定係睇科技產業。

科技產業可細分上中下游，上游晶片類，最惹政治是非，郁下美國又禁出口，d企業就無乜運行！呢期NVIDIA d升勢只能跟大市升，無乜突出，都係因為咁！

加上晶片架構既「免費開源碼」趨勢逐漸成形，google 的android 作業系統都開始針對RISC-V呢個開源處理器設計涵接編碼，咁對ARM 既未來收益構成重大威脅，呢隻股票有d危！

中游的雲端科技，表現中規中矩，能提供AI 雲端服務的大企，好似阿馬遜、微軟同谷歌等等，要升都升曬咯！不過，佢地AI服務仲喺度不斷提升質素中，股價仍會繼續跑上。

下游我最唔睇好蘋果，食老本十幾年，iPhone 都好難有驚喜創新，過多幾年，我真係擔心佢既市場熱度會跌到好似Mac 機咁；電動車市場太多製造商啦，已非常飽和，連Tesla 都產能過剩，要劈價求售。

睇嚟睇去，未來最有新意既產品，都係會飛既汽車！