美息要過6釐，係要為美國國債市場做好冧市準備。

大家睇我既文章，特別係經濟同埋投資分析，應該會覺得我既想法唔係太「大路」。

無他，因為我所寫既，真係我獨立思維出嚟的結論，我甚少看大眾媒體的分析，一來無時間睇，二嚟我很多時都覺得嗰d分析人云亦云，又馬後炮，無乜用！

就好似美國加息，前一段日子一上到5釐，我就四周圍都聽到話已見頂啦，我極不以為然，我認為美國重要加，起碼要到6釐（而家我睇法更過份，要超過6釐），如果你嗰時相信大圍所講既，走去買美債，你有排蝕！大家睇我文可以做證，我一直都為文指出要升到6釐，美聯儲才肯罷手，而家我認為唔止6釐㖭！

你可能會咁認為，照理美國通脹已被壓下，最多升到5.75都差不多啦，唔駛6釐咁盡嘛！

我講過，睇當下經濟情勢，唔可以只著重經濟因素，要睇埋政治。

我認為美國一直最忌憚中國既，就係中國外匯儲備中的美國國債，如果中國經濟力弱到迫不得已要大手拋售美國債，美國國債市場定必出現狀況，咁就真係會動搖美國既環球金融佈局。

所以，美國要有準備，以應付中國突然打出呢招七傷拳！因為若有一日中國拋售美國債，美國就必須印美元接貨穩住大局，印美元就要減息，因此，喺而家有條件加息的情況下，美國會盡量加息，創造日後可減息的空間，呢個空間愈大愈好，高過6釐更好，只因美國唔想步日本之前既後麈，出到負利率，經濟都無乜反應同起色。

我呢種睇法，夠怪味！？我知，出面應該無人咁睇法，但我真係咁諗，你唔可以改變我思路，只可以對我的觀點嗤之以鼻。