編程你也要懂生意之道

這篇表面像在講編程，其實不然，是在談如何抓錢做生意，學電腦程式的目的本應如此。

昨天跟一位從事programming 的舊生閒談，我說學習程式語言兩年，留意到，原來d程式社群真係好勤力，日日喺度去蟲、update 又upgrade，好忙好有動力；然而，每門學問都是這樣，從事的人會愈走愈前，不經意地便走進牛角尖。像經濟學，d學者做數做到儍曬，完全同現實脫節。

最重要的是，學程式的人會深深受感染，被「道」了下去，愈學愈迷。

我有位舊生走去上程式課，該位老師說某某程式「out」啦，而家要學最新乜乜乜！我聽後，大感困惑。

如果我十年前用Java 起了成套生意體系，包括 網站、手機應用，後端全是用Java 寫的，操作穩穩定定，生意又好，我會唔會因而家Java 唔興啦，就去轉新野？轉去Python？

玩咩！盤生意嚟架，好比我做實業生意，開實舖既，好多客人，我會唔會突然又重新裝修，推倒重來？ 用家講習性，明明買開野既地方，無論實體與虛擬，只要一變，又或運作突然唔穩定，佢地就會走，真係茲事體大，唔可以輕舉妄動。

我當然不是說，程式系統穩定就可以十年如一日，十年八年就真要overhaul 一次，唔係就跟唔上已被「肯定」的新科技，但真係唔會立亂試新野，程式社群日日有新野，科技世界天天有潮流，我做生意搵錢既，唔會貪得意貪新鮮話換系統就換系統，大佬！涉及本業的利潤，換程式系統真係好大件事，絕不能兒戲！

我這位舊生也有共鳴，分享到有時盲目追求開發，但最終做出嚟既野根本未必受用家關注和青睞，咁個App 幾完美都好，都係白做，係枉然！

Exactly！ 寫程式好容易令人迷下去，追求完美，但殊不知用家根本不關心，情況好比你自拍，你會好緊張相中自己既細位，但大多數人睇時只係「𥄫一𥄫」，根本唔會望到咁細緻。

我認為，每行程式都要有佢既經濟價值！追求編程完美固然無可厚非，但過猶不及就不好，凡事要講均𧗾。

編程要跟市場博奕，一旦試到市場要既部份，我地當然要追求程式系統既完美，就如你賣野試到某件貨或某個促銷手法work，當然加碼喺呢方面做好d，至於未受用家關注的部份，就要喝停，不可再浪費心力與金錢，編程的原則亦相同。

更重要既係，學編程最緊嚟problem solving，大公司嗰backend 日日有問題，你要懂如何實際處理和解決，咁你先最值錢，最王道！所以我話我編程能力未到位，就係因為我未去到呢個至高境界，相信還要學多三年。

我們總不能閉門造車，用完美的編程來自high! 要搵食㗎！