終於消失中文科綜合卷 !

今日DSE 考中文科了，對我嚟講係一個解脫，終於唔駛再教那極度形式主義的卷三綜合卷，我真係覺得呢張卷好無聊！

今早，我打開電腦既中文folder，將綜合卷那部份的練習和我所寫的範文通通都delete 曬，爽！

過去十年，如果大家有留意年青求學數代人，你會發覺佢地好憎中文；講真，比著我都憎，明明一科好有趣的學科，點會攪成咁㗎！

中文係我地母語，我最唔明點解十年前考局會將佢降格到等同英文科的考法，跟足英文科四張卷，點會咁呢！學中文科的神髓跟學一科外語有根底既唔同，至少中文既聽同講係我地既日常，基本中文既溝通能力我地一定有，何需有份口試卷和聆聽卷？如果你話要知學生講野有無紋路，一篇作文，已經睇到考生既文理，除非你想挖出嗰d寫就無敵，講就漏口既大文豪，然後「肥」左佢！但我地無理由歧視韓非子呢種天才！

聆聽卷仲無聊！過往學生問我要有乜技巧，我望望佢面上左右兩側回：「咦！乜你原來有耳仔㗎！？咁得架㗎！已經無敵！」

聆聽卷如果學生答唔掂，通常都係理解d問題出事，咁就關閱讀能力嗰邊，何需考聆聽！

其實，中文係一科好有趣味的學科，天南地北，古今中外，乜野都可以教，目的就係幫助學生「儲才」，提升佢地既學養，擴闊學生的識見，呢個一向係以前教中文的內涵，係一件好有趣既事。我預科時就遇上個這種教法的中文科老師，佢堂堂分享佢自己的人生見地，講兩行課文，就離題發揮下睇法，一時插科打諢，一時又生花妙語，都唔知幾過癮，我就係喺咁既薰陶下，喺高考中國文學攞個A返泥！

中文考「才情」，跟學第二語真係好唔同，今日考局大徹大悟，太好了！中文考法改制下，才能釋放學中文既悶氣，令中文呢科回復昔日的個性。

坦白講，我覺得份DSE Econ 卷都要徹底大翻新，我都唔知而家呢份卷可以令學生學到d乜野，好似為考而考；所考課題，左砌右堆，雜湊成一個考試大綱，欠缺完整的思想框架，零碎得令學生難以深入探究，我地昔日學習經濟學既趣味，真係蕩然無存。