細價股與「日系」交易所埋堆

我喺Youtube 都曾經講過，順應港府要發展Web 3.0，一定會有上市公司痴埋呢方面藉此提升市場焦點，係咪真心搞，就要睇嗰間公司既上市規模，一線上市公司就真唔會扼你，況且佢地要攞個牌有幾難！但嗰d三線細價股話做呢瓣，就認真小心，大有可能純粹炒作，睇下會唔會搭棚成功引到水魚落網。

今日就有間三綫上市公司話同近年喺香港頗具爭議性的「日系」交易所合作，打算申請牌照，打算姐，申唔申請到唔重要，重要係有話題有焦點，咁呢隻細價股就可以炒上，而同時間交易所代幣亦可以睇下炒唔炒得上，一箭雙雕，何樂而不為！

問題係，理性上就算比你攞到嗰牌又點，會搵好多錢？大佬！政府呢一刻就算比牌你，都係比你賣買比特幣同以太幣，你賺得幾多佣金，加上仲有其他申請牌照成功的交易所，和境外交易所，根本就唔係獨市生意，無護城河，申請到牌照都唔係代表d乜野，啫係開多間雜貨舖賣下野，如果咁就令股價倍升，就太美好了！不過，世上水魚何其多！有人信呢問公司有得發展都唔出奇！

其實，而家莫講三綫上市公司，一綫既都無乜人理，港股靜如死池，你估仲係昔日既港股咩，一線天天炒，二線輪流炒，三線莊家炒咩！而家係三線都無得炒！你睇周杰倫隻股票，傳聞乜野公司入股都好，都無乜人理！而家股市做莊都真無意思，根本無人炒港股，你點用力搭靚嗰棚都無用，搶包山咩！浪費精神，最後自己蝕住息爬翻落泥！

所以，我唔多覺得呢隻細價股會炒得起，根本港股已經變左質，仲用翻以前嗰套炒三綫股，唔work 啦！真係好out! 

反而睇下有無水魚跟買嗰隻交易所代幣，機會仲大d！