精打細算下的「唔旨在」

人一定要學會精打細算，否則，你好難儲到錢；過往我做高考補習，予人印象好像很風光（其實相比商界的能者，是小巫見大巫），新認識的人總會很快補上一句：「你都唔旨在。」我通常無言，因為心裏著實緊張：「其實我好旨在。」明明嗰情況不用我付錢，卻花費了，而我竟然覺得唔旨在，你話啦，係咪好折墮！

不過，有時呢個「唔旨在」心態都有佢既可取之處，只因你千算萬算，始終都會有失誤的情況，你計到咁盡，心態拉得太崩緊，對自己實在不好，情緒病都會出埋；呢個時候，跟自己講聲：「算啦！小小數目唔旨在！」找個態度嚟釋放自己，我認為係做對了事情。

由美孚新邨步行到附近的清麗苑，腳程也不短，但若穿過美孚和美孚西鐵站，就快好多，但你必須入閘先，而港鐵亦都行了個方面，讓該區居民可在美孚站入閘後，於同站的西鐵出口，到閘前相關位置既設施用八達通do 一下，就可免費出閘，

我有位較年長既朋友，非常精打細算，住該區，見可免費入閘當然用，但多次忘記臨出閘前do一do，白白交付了車資，心中有氣，以後還是改步行回家。近星期天氣酷熱，加上他精神不好，路過地鐵站也不入閘用這免費服務，生怕又忘記do，結果在步行途中暈倒扑在地上，要入院。

其後，我跟這位長輩說：「下次還是穿過地鐵吧！」他說：「我費時出閘唔記得do 。」

「是禍擋不了，咪當比$3.8 避過一劫咯…..」

我想續說：「$3.8你都唔旨在啦！」

但我無講出嚟，因為我覺得，呢句應該係佢自己領悟，而唔係我呢個旁人講。

我講，我覺得好無禮貌，好似幫人計梗身家咁。