相信連大發展商都出超大回佣呢招吸客

近日恆基有個紅磡新盤，叫價去到18000蚊一呎，點睇嗰盤都唔值咁多，比盡最多值14000至15000蚊一呎，睇嚟呢個盤既回佣數目都唔會細。

估唔到呢招連大發展商都用上，有舊生好奇問我，話呢個係新盤，唔怕開價低比前批買家咋型叫住要撻訂，但發展商都行呢招，點解呢？

我認為有三個原因：

第一：習非成是，回佣似乎已成買新樓的不成文作法，買家都好自然會問經紀比返幾多佢地，咁個經紀話無，心理上買家可能無咁愉快，無買的衝動。所以，發展商唯有抬高價格預留水位作回佣。

第二：我係發展商都會咁做，手上咁多貨，如果而家已經平賣，咁往後嗰d單位點賣呀！所以，而家用住呢招回佣方法遮遮掩掩個真實低價，叫做托住個面價先，雖則欲蓋彌彰，但到將來要清大貨時，先來個轟轟烈烈的低價，刺激成交的效果會更鮮明。

第三，好經濟學！因為回佣可以行「價格分歧」，回佣多少無標準既，睇買家心態同經紀促銷能力，姑勿論所淨的佣金係咪落喺經紀袋度，但每個買家比既真實價格未必相同，相同物品相同成本但交易價不同，重唔係「價格分歧」（如果香港高考經濟仲喺度，我實拎呢個情況嚟出應用題）！呢種作法有一個好處，就係等於間接微調實際交易價格，絕對可針對不同的客路(可能有D內地人唔知訂，收少D回佣)，增加交易量，賣勢都會好D嘛！

正因為以上三個原因，我認為未來兩三年，賣樓呢種超大回佣作法，會成為慣例，而且會變本加厲。