的士牌照價格恐未來三年要見一字頭

內地網約車殺嚟香港，已成必然事實，殺傷力當然唔係喺的士司機，東家無得做咪打西家咯，他們可轉揸網的，最傷當然係的士牌照持有人。

我認為關鍵係傳統的士日後可能唔夠司機，車主想加的士租都難好多啦，的士牌照就唔值錢咯。

而家香港成個經濟結構係：因為仍高通脹，人工仍要保住喺高水平先生活到，但經濟確實在「萎縮地」轉型，整體收入跌了；於是，就要犧牲不動產的價值，包括商業同住宅物業，與及小巴同的士牌照等等。

所以，如果要呢d資產既價格止跌回穩，大前提必須係所有野包括人工都要平落嚟，你可能會問：「實質資產唔係跟通脹走架咩？物價高，樓價的士牌照價都應該高架？」

原因係香港面對既係滯脹，唔係常態既通脹，後者既不動產價值的而且確係會跟通脹升既；但前者，則滯脹率愈高，資產值跌得愈狠。

睇嚟未來兩三年，滯脹未會緩和，的士牌照價格難有上升的可能；加上而家的士行業已經唔係好旺，仲引入埋內地的網約車，先嚟爭司機，再嚟爭客；無錯，開頭有限「輛」，但將來只會愈來愈多，的士牌照好難再好似以前咁好炒！

記得廿年前沙士時，我搭Lift ，有個老人家同家人講緊，買樓投資好吖，定係買的士牌照，心大心細。

而家，唔知仲有無老人家諗呢？

咪住！我咪係老人家咯！我無諗bor ！